اقتصاد

الاصلاحات الاقتصادية الا خيرة وفضفضة من عاشق لتراب مصر

فضفضة لمصرى لف العالم اكثر من مرة ومقيم بالخارج اكثر من 38 عام

الإصلاحات الاقتصادية

بقلم الدكتور /هشام فريد

أمين عام الجاليات المصرية باوربا

 

أنا عايش ٣٨ سنه بره مصر وفى اوروبا وسافرت وشفت واتعاملت مع جنسيات العالم لكن أقسم بالله العظيم

عمري ما سافرت بلد أو قابلت شعب عايش عشوائي زينا ،،

القصه مش قصه بنزين و جاز و دعم و الكلام ده خالص القصه اننا فعلاً عشوائيين و عجبنا الحال

قاعدين بس نتحسر علي الدول المحترمه و نفسنا نبقي زيها بس من غير ما نتعب ولا ندفع مليم

عاملين زي الراجل اللي بيدي لمراته 10 جنيه كل يوم و عايز يأكل بيهم جمبري و لو قالتله منين يقولها : أتصرفي

طيب و هي هتتصرف منين يا نطع ؟!

تقوله طيب استهلك علي قد ظروفك مش عايز !!

طيب عيش علي قد إمكانياتك مش عايز !!

انا عمري ما شوفت شعب بينام علي صوت التليفزيون و بيرجع يصرخ من فاتوره الكهربا الا الشعب المصري !!

عمري ما شوفت ناس بتشتري الخضار و الفاكهه بالكيلو الا المصريين !!

عمري ما لقيت ست بتعلق أربعين كيلو ثوم في البلكونه و بتخزنهم الا الست المصريه !!

مسافرتش دوله في العالم و لقيت فيها ” 352 ” رغيف عيش بدولار الا مصر !!

مشوفتش مواطن بيفتح خرطوم المياه ساعه العصاري علشان يرش قصاد بيته أو ورشته الا المواطن المصري !!

مشوفتش شاب بيشيل موبايل قسط سعره عشر أضعاف راتبه الا الشاب المصري !!

مقابلتش شعب حاطط في الكنب و تحت السراير نص مليون جنيه و بيروح يشتري فدان الارض و هو راكب حمار … الا شعبنا !!

مقابلتش شعب بيستلف فلوس علشان يطلع يعمل عُمره أو حج الا الشعب المصري !!

مقابلتش أب عايش علي الديون علشان يدخل ولاده مدارس دوليه و يجيب لهم مُدرسه بيانو بالسلف غير الاب المصري !!

ملقتش ست بتعمل جمعيات علشان تشتري دهب تغيظ به سلفتها و اخت جوزها الا المصريه !!

مشوفتش شاب بيحط بنزين في عربيته علشان ينزل يشقط بنات من الشارع الا الشاب المصري !!

مشوفتش ست بتخلف 6 مرات علشان تجيب الواد و تنتصر علي حماتها الا الست المصريه !!

احنا عايشين سبهلله و نشأنا علي موروثات غلط ولازم تتغير بقينا نحترم اللي لابس الساعه ال Rolex و راكب العربيه ال BMW و ماسك i phone و بنقول عليه ابن ناس !!

لذلك بقي الكل عايز يعمل فلوس بأي طريقه و مش قادر يضحي علشان يشتري أحترام الناس له ،،

و بقينا مش قادرين نستحمل اي ظروف احسن نتعاير و منبقاش ولاد ناس !!

كفايانا بقي مسخره و فشخره كدابه

علمنا ولادنا المرقعه و طلعناهم بطرانين علي عيشتهم و مش عاجبهم العجب مع العلم اننا لما كنا في سنهم مكنش عندنا ربع الإمكانيات دي و كنا راضيين و حامدين ربنا و منقدرش ننطق بكلمه ،،

و علي فكره انا مش بقول كده علشان عايش بره مصر بالعكس انا متضرر اكتر من اي حد لاني مطالب أبعت فلوس زياده لأسرتي تتناسب مع زياده الاسعار في مصر و مطالب أتحمل ضريبه الإصلاحات اللي بتتعمل في البلد اللي انا عايش فيها ،،

لذلك انا شايف ان اللي بيعمله السيسي ده عباره عن جرعه كيماوي لشعب ضرب في جسمه سرطان من سنين و مبقاش قصادنا أي اختيارات

أما دوله قويه محترمه ذات سياده و ليها جيش او دوله شحاته بتصرف علي بُطُون المواطنين ،،

اما نتحمّل الكيماوي بصبر او ينتهي أمرنا بلا رجعه .

شوف بقي و قرر انت عايز ايه ؟

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

إغلاق