في حب مصر

باأحبها
و لاهو غباء و لاهو نفاق
و لاهو رياء…
ده عشق و قد يكون ترياق
بيني و بين الساكنه فيُا
ما بين ضلوعي
و ف الوريد…
و مسكناني العمر كله
ما بين رموشها و ننها *

و هي الروح و هي البوح
و بل و كمان سفينة نوح
و غيطي و بيتي و الحاره *

باأحب هواها و النسمه
و دم شهيد علي الرسمه
و ناس الحزن متقاسمه….
و جار بيخاف علي الجاره

و أموت ف صباحها
تسقيًه و طعميًه
و ناس سردين ف عربيًه
بدون لا إزاز
و نور إن جاز
و وضع و شاذ
و عين الرب ستاره *

آااه و ربنا….*
باأحبها دار و دقة زار
و ناس هيًمانه ف الأذكار
و منشد ف الرسول مداح

و أموت ف صباحها
مدنه و دير
و صوت عصافير
و طعم فطير…
و خير موجود لناوي الخير
بإيده ليل نهار لواح *

و أحب يا ليل ف مواويلها
و راها يا عين تعين حيلها
و تنده ع الهمم فوقي *

و باأعشق نيلها لو خاسس
و لو زايد
و كيف ربك ما له رايد…
لأنه بيجري في عروقي *

و رغم الآهه و الأنه
و صحة حالي قول كنه
و لسه ماشوفتهاش جنه..
و ناقص ياما ف حقوقي *

هاأعيشها بعيش و دقه
و فول
و هاأفضل أعيد و أزيد
و أقول….
غيامه و بالمشيئه تزول..
و فركة كعب و تروقي *