من ديوانى… أغاني النوٌسانى

وإن سألته في إنتماؤه
و ف ولاؤه لمين و ليه…
تلاقيه يبرٌق و بغباوه
جوز عينيه….
و يجيله حاله من الصَرَع *

علشان كِده و إخوات كِده
هُمه كِده…..
بيكرهوك و يكفروك
و شتيمه فيك و ف مين جابوك
من أبوك لغاية مَنقرع *

يااا من قرع باب الغوالى
بالنتانه و بالنداله و بالخيانه..
مع نِيٌه زَرقه و فكر بور *
يااا من جَلب للدار دي فُرقه
و ويل و حُرقَه…..
و دين بكيفُه و شَرع زُور *

قول لرَبعَك إن أنا مهماً يكون
هاأفضل هِنا….
حارس لغيطي و حَد حيطى
و طرح توتى و الكافور *

قول لرَبعَك إن رَبعى
برغم ضيق الحال مُحال….
ما يكونوش فوق الشواشي
و ف العلالي….
مثبوتين ماضيٌين حضور *

أما اللي كارِه بالسلامه
الباب يفوٌت مِيت حَمَل….
ألف كَسعه يروح يغور *
،،،،،،،،،،،،،،،،، ،،،،،،،،،،،،،،،،،،
( السمطى )