د.خيري السلكاوي (مصر)

امتى يا جرح تطيب
م الرعد و الزعابيب
و كل زخة مطر
تجيب حبيب لحبيب
و تشد عود ع الوتر
تعزف عليه حبي
تغسل هموم قلبي
و الصبر فرجه قريب
ترسم على دربي
قلبين و بينهم سهم
بيوصل المكاتيب
يمحي خطوط الوهم
و يكتر المشاريب
= قهوة جنابك ايه
– متحوجة بالبن
ع الريحة أو سادة
= ايه غيرك يابيه
طول عمرها كانت
مظبوطة و زيادة
– الدنيا خيرها قل
كنا زمان سادة
و الصبر هو الحل
و رقبتي سدادة
= كوباية او فنجان
– مش فارقة كالعادة
بس المهم انها
مكتوب على وشها
ان الحبيبة مصر
عايقة وولادة