تعرف تحسب ؟؟؟

تعرف تحسب ؟؟؟

بقلم/ شيرين عرموش

تعرف تحسب حاصل ضرب اتنين عشاق

نسيوا العهد وباعوا العشرة وقالوا يافراق

واجمع فوقهم كل عذاب وأي آلام

واطرح منهم لحظات صدق كانت أوهام

واقسم كل الهم ده كله ع الأيام

وشوف الحسبة حبيبي هاتطلع كام ؟؟

واوجد ناتج التربيع

لغرام فضل إنه يبيع

ساب البسط لوحده يضيع

لما مقامه ما كنش منيع

وعلل فسر جذر مكسر

وكسر مأصل

وحسبة تقييلة عايزة مفسر

وأنا مش عنتر جاي يتمنظر

أنا خط ف عشقك واتسطر

والبرهان محتاج إثبات

أو محتاج لضميرك حي

وأنا مش جاي

أكون لهواك مدير حسابات

وأنا بالذات

أكتر حاجه أكرهها ف عمري الرياضيات

فيبقي بلاش

وفضها سيرة

أنا في الحسبة قليلة الحيلة

وأنت معلم ف الحسابات