اصبغ شعرك بقلم/ طه إبراهيم
اصبغ شعرك بقلم/ طه إبراهيم
اصبغ شعرك
بقلم/ طه إبراهيم
**********************
اُصبغ شعرك خف حواجبك
إعمل نفسك فرقع لوز
لمّع وجهك شدّ في جلدك
انت فنظر الدنيا عجوز
شعرك لبيض سر جمالك
يعني دلال ووقار ونفوذ
شعرك لبيض نور فوق راسك
يوم الحشر يساوي كنوز
شعرك لبيض هو رصيدك
جوه الجنه مكان محجوز
شعرك لبيض نور هاينور
لما في يوم العتمه تفوز
ليه بتغير فطرة ربك
ليه تتمرد وانت عجوز
فاكر إن الدنيا هترجع
تحت إشارتك لما تعوز
يعني هترجع تاني صُغير
تلعب عُقله وتكسر لوز
و لا هاتمرح فيها وتلعب
بين مزيكه وبين اراجوز
و لا النيه يا عمي عروسه
شابه جميله بردو يجوز
اصل الست الهانم كبرت
جوه الصحه سرير محجوز
وانت شباب فوق الستين
حقك تلبس شورت وشوز
فوقي يا حآجه فوقي ياستي
اوعي تقولي كبير وعجوز
اوعي تسيبي الراجل يصبغ
أو يتغني بصوت فيروز
يبقي ساعتها جنابه اتعلق
قلبه مشعلل نفسه يفوز
شايف إن الدنيا جميله
و اللي هيجري يلاقي حظوظ
فاكر نفسه الواد أبو اصه
يكره جدا قشر الموز
حتي اسنانه يا عيني مفيش
نفسه يقزقز حبة لوز
اُصبغ شعرك خف حواجبك
إعمل نفسك فرقع لوز
لمّع وجهك شدّ في جلدك
انت فنظر الدنيا عجوز
انا مش ضد إنك تتجوز
أو تتهني بأي حظوظ
انا مش عايزك تعمل شاطر
شاب حليوه او ننوس
تبقي البنت يا عيني فصدمه
وانت علاج و حقن كلوكوز
تبقي ظلمت البنت يا جدو
من احلامها وأي حظوظ
اصبغ شعرك خف حواجبك
اعمل نفسك فرقع لوز
لمع وجهك شدّ في جلدك
انت ف نظر الدنيا عجوز
**********************
بقلم .. طه إبراهيم
