ياخسارة يادنيا صابرقدح
ياخسارة يادنيا
صابرقدح
ياخسارة يادنيا
حسبتك عالية
وفيك الناس تنباس
لقيتك فانية
فاضية ومالية
بالغل قلوب الناس
ياخسارة يامايلة
لقيتك آيلة
مافيش إحساس
وجوه وبتنافق
نفوس وبتنافس
رجلين فوق الراس
مقلوبة حياتك
عليها فتاتك
بميزان حساس
بالنسبة لى خلاص
مش عاوز اخلاص
كله .. بينداس
ياخسارة يادنيا
حسبتك غالية
أعلنتى الإفلاس
أتارينى فى حلم
كابوس للعلم
من غير حراس
مابقاش صاحبى واخويا
بلغت فرار لأبويا
ما أحلى الكاس
الموت أرحم منهم
ولا شفت أرخم منهم
كاس وداير ع الناس
الله يرحمنا بقى
كفاية دموع وشقى
خلص رصيد الاحساس
ألو … مافيش ولا رنة
فى الهم دايما يتمنى
اللى عامل حساب للناس
ألو ..مافيش حرارة
القلب مليان مرارة
من أفعال الناس
يصب فى الوش حنية
فى الضهر ابن جنية
يحط الفيل ف قرطاس
ألعوبان على سيرك
يغزل الحنان بمارك
يخلى التراب ماس
باض الفرخ ع الشجر
يلعب بالبيض والحجر
ألعن من الوسواس
يأذى اللى منه
لا همه خاله ولاعمه
عامل للمطرة احتباس
مانع للرحمة واللمة
قاطع الخالة والعمة
سلامه ضربة فاس
شوه بغلّه أيام السلام
دهس برجله أبراج الحمام
باع الأونطة فى اكياس
ياخسارة الرحلة
بتفوت ولاتسوى
بخّة قلم فى كراس
بيتوه الكلام ويتبعتر
تدوس الآلام وبتكتّر
وحروف الكلمة تحتاس
كدب اللى زمان.. قال
ولاّ الله أعلم بالأحوال
جنة بلاناس ماتنداس
هاسيب الأمر لسيدى
بإيده هو مش بإيدى
يرجعلى فرحى وعيدى
ويكفينا عيون الناس
يملى قلوبنا قناعة
نحب بعضينا بوداعة
لجل ماننول الشفاعة
ورضا رب الناس
صابر قدح
2019/7/13
