(متأرجحة بين الرجا والخوف) شيرين شيحه

متأرجحة بين الرجا والخوفْ

ومصدّقة بس الأمل مكتوف

لو بالإدين نضحك مَ كُنت بكيتْ

من غير ضيا.. خطاوينا مش بتشوف

==========

مدّيت إديّا قطعْتْ حبلَك ليه؟!

كسْر القلوب ما له علاج يداويه

الزرع من غير الأديم بيموت

والورد يدبل لو مطر يجافيه

======

أنا مش مَلاكْ.. بعمل ذنوب وبتوب

والتقوى توب يستر.. ساعات بيدوب

ظُلمَكْ لنفسك زي ظُلْم الغير

عَشَمي ف كريم يراضيني ف المكتوب

=========

قلبي ربابة والهوى مواويل

والحُب مش غنوة وسهَرْ بالليل

الحُب رُكني لمّا حيلي يميل

يشفي الجراح والعُمْرُ نبضو عليل

#شيرين_شيحه