إيه ذنبها شعر شيرين شيحه
إيه ذنبها
لمّا تجرح قلبها وتنساني بيها
زي ما نسيت اللي قبلي بيا قولّي مين هتيجي بعدها؟!
دايرة عجيبة ومُفْرغة حواليك تدور
وانت وحدك إللي ساكن قلبها
أنا شوفتها
من جوه حلوة
وذنبها
كان قلبها
فاتح بيبانو لأي حد بيطرقو
بالحب كان أو بالخداع
كان ذنبو إنه بيشتري..
والكل باع
حاجة غريبة هقولها يمكن وصفها : “نوع م الغباء” :
يمكن
ده يمكن لو حصل
يوم واتقابلنا لوحدنا ( هِيّا وأنا)
ممكن أوي
ممكن نكون م الأصدقاء!!
ما هي أصلها شَبَهي أوي
ساذجة.. بريئة.. مصدّقة
إن الزمان ده لسه فيه “مجنون بليلَى”
راح يموت م الحب أو
هيكفّنوه ف توب “الوفاء”
هِيّا كمان
بصّتْ عليّا من بعيد أنا شوفتها
خلف الدموع مستغربة
كان الشبه بين قلبها وقلبي كبير
وبصورة كانت مُرعبة
غيرانة لكن..
بيّا كانت مُعجبة..
آسية يا دنيا ومُتعبة
بتْخَبّطينا ف بعض.. نجري..
تلحقي
وتقيّدي منّا الإيدين
بالحب مرة
وألف مرة بالوجع أو بالحنين
وسؤال كتير بنرددو متحيّرين
رغم إننا
عارفين إجابتو بنسألو في كل وقت وكل حين :
(مين اللي فيكي..
مش حزين؟!!! )
#شيرين_شيحه
