إلا أمك وأبوك … رباعيات صابر قدح
إلا أمك وأبوك
تضامنا مع كل أب مكلوم
رباعيات /صابر قدح
بعد الشقاوالضنا وليالى العذاب .
ترموا اللى رباكم من غير أسباب
قلوب حجر متفصلة من قسوة
أيامكم أِوَض متقفلة بهباب
*وعجبي*
اللى رباكم جزاءه يترمى ف الشارع
علشان راحتكم كان بيسعى ويصارع
يا لْبعيد انت ومالك ملك لأبوك
إلا أبوك بروحه يفديك ولا يمانع
* وعجبي*
خسارة تشيلو اسمه وكمان الحياه
اللى يقسى على أبوه ياحسرتاه
حرَم نفسه كتير عشان يربى بغال
وحرَمت نفسك رضا ربنا ورضاه
*وعجبي*
بعد القساوة بيقول ربنا يهديه
مش قادر يدعى ع اللى معاديه
وعلى أد ما شاف من ذل ومهانة
بالكلمة مش قادر يقسى عليه
*وعجبي*
أبوك ولو الكون كله إلا أبوك
هو الحماية لوالناس حاربوك
اجعل هدمتك فرشة وخدك مداس
عمره مايسيبك لو الناس سابوك
*وعجبي*
نهارالصبح هو. دفا الليل والسكون
من غيره ياولد انت.. ايش تكون
ماجابش كل اللى انت محتاجه
لكنه جاب كل اللى فى العون
*وعجبي*
اوعاك في يوم تهمل ف أبوك
هو وامك تعبو لما ربوك
تبقى انت متغطى ف لحافك
بردانين ومن الصقعة يداروك
* وعجبي*
خلاصة الكلام بقى عشان تعيش
من غير ابوك وامك انت مافيش
ان راضيتهم يرضى عليك ربنا
وبعد كده لأى شيء ماتسألنيش
*وعجبي*
صابرقدح
