سجن المشاعر بقلم القس لوقا فايز سناده

⁃سجن المشاعر
بقلم القس لوقا فايز سناده
نجتاز احيانا في مشاعر سلبيه تاسرنا بل تقيدنا تعصف بكل طاقه بنا تهدم بذور الفرح داخلنا تسكن في اعمق اعماق حياتنا تطاردنا باستمرار حامله معها سيل من العواصف المدمره للنفس وتترك اثارا سلبيه على الجسد
ان كنت تعانى او عانيت من كونك تشعر بالوحده وسط الزحام وفى وحدتك مشاعرك تزحمك اقرا معى تلك الكلمات لعلنا نجد مهرب من هذا السجن اللعين
أسوأ (١٠) مشاعر ممكن انسان يمر بيهم في حياته . فيقعد مع نفسه فترة طويلة ندمان علي اللي عمله لغيره او في نفسه . ١٠ مشاعر بتوصل الإنسان إنه يشك في الفطرة السليمة وتضرب له القيم والمباديء وتشككه في نفسه.
١: لما تكون بين اهلك وناسك ، اصدقائك وزمايل الشغل ، عشرة العمر ، وتحس إنك أكتر حد وحيد في الدنيا، لما تحس إنك في وادي وهما في وادي تاني خالص، وكل اللي حواليك عبارة عن فراغ.
٢:لما تعيش في غربة عن نفسك، حد ضايع وتايه بين اللي حواليك، لا قادر توصل للشيء اللي بتتمناه ، ولا قادر تكمل مع شخص بتحبه.. مش عارف تلاقي حد ولا شيء، ولا مكان ترتاح فيه وترمي حمولك عليه .. لإنك ببساطة في الأساس مش لاقي نفسك ، عايش محبوس جوه زنزانتك في الكونفورت زون بتاعتك.
٣: لما تعيش اطول فترة من عمرك تعطي وتساعد وتشيل اللي حواليك بلا مقابل، وتحصد بعد كل ده ” قلة تقدير وإساءة” وكأن ذنبك الوحيد انك كنت ابن اصول وكريم اكتر من اللازم.
٤:لما تحس إن أكبر غلطة ارتكبتها في حياتك، إنك كنت ” شخص صبور” اتحملت كتير وقليل بدون شكوي واحدة بس، واللي قدامك بيستغل صبرك لصالحه هو ويوم ما تيجي تتكلم يطلعك انت الغلطان.
٥: لما تندم علي كل حاجة حلوة عملتها وكل شعور حلو او إحساس بالحب حسيته تجاه حد معين ، نتيجة لمواقفه المخزية وتصرفاته السيئة معاك طول الوقت.
٦: لما تقع وما تلاقيش الإيد اللي تتمد لك، ولو اتمدت لك تبقي عندها خطط ومستنية المقابل، ولما تحزن وما تلاقيش الإيد اللي تطبطب عليك، ولو طبطبت النهاردة ما بتكملش معاك نتيجة للظروف او تغير النفوس.
٧: لما تتصدم كل يوم في حد من اللي عايشين حواليك ، وتكتشف إنه مزيف ، ويسقط يوميا قدامك قناع ورا قناع لأشخاص كنت فاكرهم هدايا من السما وهما دول اللي طلعت بيهم من الدنيا، وتكتشف انهم بس عبارة عن مجموعة من ناس خسيسة ومزيفة وأندال اندال اندال .
٨: لما تقف عاجز قدام انقاذ حد قريب منك من الغرق في متاهات الحياة ، او عاجز تمنعه يكمل في طريق مسدود او تقنعه وتوعيه إنه طريق ملوش فايدة، لما تقف عاجز انك تحمي حد قريب منك من نفسه.
٩: لما تحب اوي ، بقلبك وروحك، وتحكي للناس وتتفاخر ب اللي بتحبه، وتكتشف في الآخر انك كومبارس ، مش بطل الحكاية ولا حاجة . كنت مجرد نمرة واتلعب بيك وعليك.. وان الحب اللي قدمته كان مجرد وهم في خيالك انت بس.
١٠: لما تدوق الظلم علي ايد اقرب الناس ليك ، ويموت جواك دفاعك عن نفسك لإنهم مش هاينين حتي عليك تعاديهم او تقف في وشهم.
اهرب حالا لحياتك لا تبقى ولا لحظه فى ذلك السجن اصنع لنفسك نفق تتسلل منه من تلك المشاعر تجاهل كل هولاء الأشخاص تجاهل تلك الأحداث قل لنفسك انا من بلد ثانى من قاره أخرى قم بالجرى من محطات الياس اركب قطار مكيف من الافكار الإيجابية قل لنفسك ساموت ولكن لايجب ان اموت حزينا لا احد يستاهل انى اموت وانا مقهور بسببه انظر لاهلك لاولادك لبيتك لنفسك انجح من اجله انظر الى الله سبحانه وقل له انا ليس لى استطاعه بهولاء ولا قدره عليهم اتصرف انت واخيرا صالح نفسك أغفر لها الخطايا والذنوب من منا بلا خطيه كن معافى