هناك 3 أسباب رئيسية تسببت فى ظهور عنوسة الرجال

بقلم / رضا السعيد 
السبب الأول: موروثات تم زرعها فى عقل بعض الشباب من قبل الأهل و المجتمع ونتذكر منها ” بكره تقعد عالبساط وتختار ست البنات ” و هنا يختلف مفهوم ست البنات فمنهم اللى شايفها جميلة جدا و منهم اللى شايفها مثقفة و عملية ومنهم اللى شايفها لازم تجمع كل الصفات و هى شخصية مش موجودة على الأرض و حتى يلقى ضالته يطوف على البنات كأمير متوج و تكون أسباب الرفض و المتوقعة قبل القبول كالاتى 
أسباب الرفض
حلوه بس سمرا انا عايزها بيضه ..حلوه بس مليانه أنا عايزها رفيعه..
أو ممكن يكون السبب حلوه بس متكلمة دى حتتعبنى و العكس بقى حلوة بس هادية انا عايز واحده اجتماعيه
و الأم و الأب بيكون لهم دور كبير خلى بالك دى بتشتغل مش حتراعى بيتها أو العكس خلى بالك دى مش بتشتغل مش حتحس بالمصاريف و لا حتشارك فى البيت أو خلى بالك أصحابها كتير دى اجتماعية وطموحة لا خلى بالك أصحابها قليلين دى مقفولة اوى
وقد وصل الأمر بالشاب أنه حاسس أن نجما من السما أمير بيدور على واحدة من الرعية يتفضل عليها بزواجه منها و فقد المعنى الحقيقى للزواج المودة و الرحمة المشاركة فى رحلة الحياة أصبح له حقوق و ليس عليه اى واجبات كتير غير أنه وافق بالجوازة.
الزواج خنقة
أما السبب الثانى :و هو اعتقاد بعض الشباب أن الزواج خنقة عيال و مصاريف وواحده تقولى رايح فين و جاى منين تعالى نودى الولد للدكتور هات أكل من السوق وانت جاى.. طيب مانا كدا شارى دماغى بشتغل و بتفسح و أمى بتأكلنى و والدى بيصرف عليا و مرتبى فى جيبى أصرف ليه تقوله الأسرة يرد يعنى هما اللى اتجوزوا خدوا ايه ..
دور الأصحاب
و ده حتلاقى دايما أصحابه مبيحكوش أي ميزة للزواج أمامه كل حكاويهم عن الخنقة والأولاد و المصاريف نتيجة انهم مش شايفين او مش عايزين يشوفوا اللحظات الحلوه فى حياتهم زى ان يكون له طفل جميل يربيه و ينشأه على أسس خلقيه و دينيه لحظات بيضحك فيها مع طفله من شقاوته لحظه طيبة قضاها مع زوجته فيها مشاركه و حب و احترام و دا برضه ناتج عن تفريغ كلمة الزواج من معناها الحقيقى أسرة وبيت و عيلة ودفء ولحظات مشاركة .
ضعف الإمكانيات
أما السبب الثالث : وهو ضعف الإمكانيات اللتى يتطلبها الزواج فى الوقت الحالى فمعظم الشباب و البنات الآن يريدون أن يبدأوا مما انتهى أهلهم فلابد من وجود شقة وعربية و دخل شهرى محترم وفسحة كل سنه فى أحد المصايف أو العواصم الأوروبية مهر و شبكة وفرح كبير حتى و إن كانت هناك فتاة عندها استعداد للتضحية و المشاركة وتسهيل الإمكانيات فيصيبوها بسوء الظن إما ان يتم التعامل معها بطمع او يظن بها أنها مش لاقية تتجوز أو بتدارى على حاجه غلط بمشاركتها .
مفاهيم فقدناها
فقدنا مفهوم من ترضون دينه وخلقه فزوجوه.. اخطب لبنتك و لا تخطبش لابنك.. (الاب لو عمل يبقى مش تمام صغر بنته )
مبيقناش عارفين يعنى ايه احنا بنشترى راجل ..مش معنى إنك عايزها بشنطة هدومها انك تتحكم فيها و ميبقاش لها حقوق ..خلى بالك انت حتقعد عالبساط و تختار ست البنات لكن هى برضه حتختار سيد الرجالة
لو كنت فاهمه أن الراجل ميعيبوش إلا جيبه تبقى واهمه ..خلى بالك يا واخده القرد على ماله بكره يروح المال و يفضل القرد على حاله .خلى بالك الراجل مش بنك فلوس و انت خلى بالك البنت مش ملاك لها عيوب و مميزات بس مش حتلاقي لها كتالوج