محمد هنيدي يكتب رسالة مؤثرة عن محمد صلاح بعد هزيمة ليفربول

وكتب هنيدى عبر صفحته الرسمية على موقع فيس بوك قائلا: “عارف لما بتبقى بتلعب بلاعب فى البلاى ستشين وفجأة تلاقيك بتنافسه أو اللاعب بعد ما اعتزل بيحلل أداءك فى التليفزيون وبيوصفك بالأفضل فى منطقتك فى العالم“.

وتابع هنيدى: “عشان كده بقى عايز أقول حاجة، بقالى فترة بشوف “بعض” الشباب اللى بيحاول يسخر أو يقلل من صلاح، يمكن يكونوا ما بيحبوش صلاح أو بيشجعوا فرق منافسة، من حقك ما تحبش صلاح وحقك تحب فريق منافس وتشجعه، بس الفكرة ليه تقلل أو تكره واحد قدر يعمل اللى ملايين كانوا بيشوفوه مستحيل“.

وأضاف هنيدى: “صلاح اللى كان بيسافر بالقطر كل يوم وينام فى النادى على الأرض وبدون واسطة قدر يصنع نفسه من الصفر، لغاية لما وصل أنه بقى ينافس على الأفضل فى العالم، صلاح زينا وشبهنا، ما تولدش فى بقه معلقة دهب، وقدر يكون مثالا لأى واحد بيتعب وشايف أن حلمه وهدفه مستحيل يتحقق“.

واستكمل هنيدى: “صلاح مثال لأي شخص مجتهد وبيمر بظروف صعبة وحياة صعبة، مثال إنك تقدر مش بس تكون الأفضل فى بلدك تكون الأفضل فى العالم، الفكرة مش فى الشخص الفكرة فى الفكرة نفسها، أن يكون عندنا شخص وأشخاص طبعا فى مجالات كتير تانية زيه، قدروا يحققوا اللى أنت وإحنا كنا شايفينه مستحيل، فالحب والتقدير لصلاح مش حب لشخص، حب لفكرة ونجاح، وهاردلك لصلاح“.