نانى الجوهرى تكتب : ياوجع السنين

بقلم :نانى الجوهرى 

يا وجع السنين لميت عاش..
اتجوزيه ده أصله طيب وفرصة حلوة ما تسيبهاش..
طيب وماله ده وعدني يخلص يجيب ويغرف ويدفي حتي هو مايتغطاش…دعيت يارب بارك يكون سند لكل حيط شرخه الزمن وما إترماش…
وكان اسبوع دلع ويومين شجن ويوم ملام وشهور عتاب وسنين عذاب ومن يومها وقف الزمن وكل حلو راح ولا جاش..
وبقي قلة ادب وهاتي لي دكر يا بت وبت ومافيش ندالة ما جربهاش..وكم اه ودمع حفر علي الخد مجري لا طبيب يداوي ولا في إنعاش..خلص الندم داب القلم كل الورق برضه ماكفاش..
لا ولاد طمر ولا نجاح غفر و جمال وخفة ما شفعلهاش..
يكونش الدعوة قلبها الهوا طلعت السما وماعدلهاش…؟
حاجة تشتت حتي الذكري ماسبتهاش..نهاية مخيفة ما حبتهاش

خالص تحياتى
الكاتبة نانى الجوهرى