1000 رحمة ونور بقلم نهله الديب 

بقلم/ نهله الديب

…………

بيقولوا 1000 رحمة ونور ..

على كل اللي فارقني ..

بألِفْ على حبايبي وأدوور ..

وأدور ع اللي راح مني ..

ساعات أبكي بدون ما أدري ..

ساعات أضحك على ذكرى ..

بكون عايشة مع الماضي ..

برغم الوحدة مش فاكرة ..

أتمنى لو دقيقة أرجع ..

أسلم بس مش أكتر ..

لكن حتى السلام أوهام ..

ووقت الفرح يتكبر ..

عجيبة الدنيا دي والله ..

حبيب فارق .. حبيب ولىَّ ..

وعهد بناخده ع الأحباب ..

بحكم قدرنا ما خلىَّ ..

غرورة مشاعر الإخلاص ..

بمركب غادرت المرسى ..

خدت وياها أحلامنا ..

مع كلامنا .. و1000 يمين ..

بأن لقانا ده مصيرنا ..

ومهما بعدنا واتغربنا ..

لأحبابنا أكيد راجعين ..

مع نور الصباح .. جايز ..

مع شمس الضحى .. يمكن ..

لكن ليل الفراق لو هل ..

لقانا هيبقى مش ممكن ..

قدر وقانونه فوق الكل ..

ولو كان النصيب مُحزِن ..

ولو كان الفراق مسطور ..

هقولك 1000 رحمة ونوووور.

…..

#وعجبي

#نهلة_الديب