الناس للناس “كلمات لأميمة الشرقاوى
بقلم :اميمة الشرقاوى
الناس…….. للناس. البيت أصلاً من غير ترباس
فَيدوبك تقدر تتنحنح وياساتر
وتخش وتدخل. تقعد وتربع جوا الروح
مطرح ما تروح. بتلاقي قلوب مفتوحة بحب
ولا تعرف غل. ولا كُره وحِقد
وبكل الخير الإيد تتمد. حتي لو ان كان الحال ع القد
بتلاقي الجود. والكرم الزايد فوق الحد
وتلاقي الجمعة ويوم الحد عايشين مع بعض ف بيت واحد
كلمة جاحد. مكانتش بتظهر فى المشهد
والطبق الداير بين الكل. عمال بيلف ومتعبشي
وواقف يشهد. ويأكد دايماً ع المعروف
م أهو صعب تشوف الجار بيجور يوم على جاره
ده البير وغطاه. وأخوه اللي كاتم أسراره
كان ليها كبير. وأصول مش ممكن
حد فى يوم يتعدّاها. لضحكة تملي بتلقاها
فى وشوش الكل (في صباح الخير يا اللى معانا)
ياصباح الرزق. وصباح الفل على الشجرة
الحاضنه قلوبنا وأسامينا. من حبة ملح بيترشوا
على صوت بالفاتحة بيرقينا على قعدة جدي على الدكة
ووجود عكازه اللى حامينا على كل نصيحة من الغالي
من قلب المحنة تعدينا علي ساعة المغرب فى الحارة
بعد ما رشوها بميِّة ورد. على كل طريق مفروش بالود
على أطيب ناس. رأس مالهم فى الدنيا الإخلاص
على كل الصور اللى ف أيدي. والذكري اللى أنا كنت أتمني
إنها تفضل وتعيش وتدوم على بكرة الدايب فى إمبارح
من بعد ما شاف اليوم مهموم.
مش كده ولا إييييييه
الكاتبة مدبر عام بالتعليم العام
