كيف يؤذيك عقلك بقلم مروة المصري
ليه ساعات بنفشل في إننا نتغيير؟🤔
تعالى أقولك…
التغيير عشان يحصل لازم تغير ٣ حاجات فيك على الترتيب
تغير فكرتك
تغير شعورك
و أخيرا تغير سلوكك
يعني مثلا تخيل معايا إنك وأنت ماشي ف الشارع لقيت حد شتمك
(الفكرة) اللي اتكونت عندك إنه شخص متعمد يهينك
و بالتالي هيكون (شعورك) الغضب
و عشان كده (سلوكك) وقتها إنك هتردله الإهانة
طب لو حد جه قالك على فكرة دا شخص فاقد للأهلية و مريض نفسي و غير مدرك تماما لأي حاجة بيعملها.
(فكرتك) هتتغير عنه من شخص متعمد يهينك لشخص مريض
(شعورك) بالتالي هيتغير من الغضب للتعاطف معاه و الاشفاق عليه
و طبعا مش هتفكر تاخد ضده أي موقف بالعكس (سلوكك) هيتغير تجاهه فتدعيله
كذلك لو عملت شوية تحاليل الدكتور طلبها منك و قاعد مستني الدكتور برا لحد ما يجي دورك
لو جتلك (فكرة) انك ممكن لا قدر الله يكون عندك حاجة خطيرة
وقتها (هتشعر) انك زعلان على نفسك و هتضايق.
و طبعا هيبان عليك(سلوكك) أنك اتأثرت بالفكرة دي.
إنما لو غيرت (الفكرة) دي و تفاءلت وقولت إن شاء الله خير ساعتها
(هتحس) براحة نفسية و هتدخل للدكتور وانت مستبشر (السلوك)
الله طب ما الموضوع سهل أهو 😁
أغير الفكرة… هيتغير احساسي… فيتغير سلوكي👌🏻
أومال ليه ساعات بنفشل في التغيير هقولك
عشان لما بتؤمن بأي فكرة و تيجي فكرة تانية ضدها عشان تطردها و تحل محلها بيحصل بينهم خناقة
لأن عقلك مأنتخ 😂 اه والله بيكون مستريح للفكرة الأولى و ماعندوش استعداد يثبت إنها غلط فتلاقي الفكرة الأولى بتدافع باستماتة عن مكانها
و عقلك يقولك أنت لسه هتفكر هي دي حلوة و خلاص 🤝🏻
على عكس القلة القليلة من الناس بتكون راحتها في البحث عن الحقيقة و تصحيح الأخطاء.
فلو فشلت في التغيير أعرف إنك فشلت تغير أفكارك
💜الخلاصة💜
📎خليك عارف أن مفيش حاجة ممكن تأذيك أكتر من أفكارك.. عشان كده اتخلص من الأفكار التشاؤمية..
📎و دايما أتأكد من سلامة أي فكرة قبل ما تسمحلها تدخل و تعشش في دماغك..
#غير_فكرك_تتغير
#مروة_المصري
