أنا انت و انت أنا شعر صابر قدح

أنا انت وانت انا

‏ صابرقدح

هو انت مش ناوى تصالحنى

ولا لازم كل مرة

انت اللى تسامحنى

‏انا زعلت منى

‏لما تمشى من غير

‏ماتقاتلنى

‏ولّا تنغاشنى

‏وتسيب الهموم جبال

‏تسبح ف السما

‏تعمل غيامة

‏تخنق ضل الحيطان

‏اللى قايمة بصوتك

‏واللى تحلف بموتك

‏تسبح غيامة

‏تقوِّم قيامة

‏والحساب يبقى مليون

‏حساب

‏يابحر من الدفا ويّا الوفا

‏ياساكن جوايا

‏العذاب انك تلاقينى

‏من غير ماتصالحنى

‏وتمر السنين

‏ من غير حنين

‏لأن اللى جوايا أنا.. انت

‏واللى جواك انت.. انا

‏مين يعرفنا من بعضنا

‏دابت ملامحنا

‏وانغرس جوانا الأمان

‏أصل الحنان

‏نابع من جوايا أنا

‏لأنى انا انت

‏وانت انا

‏وتعدى علينا مليون سنة

‏من غير ما تتغير ملامحنا

فلازم تجي الحياة تصالحنا

‏وتغير قانون

‏انك تكون… انت

‏أو أكون أنا… أنا

‏ صابر قدح

‏ 2022/7/18