ايمان العدوى تكتب : ولاد الأصول

نتكلم شوية عن ولاد الأصول اللي مبقناش بنقابلهم في حياتنا كتير ,

بتعرف ابن الأصول ازاي ؟؟

أنا أقولك ..

إبن الأصول : عمره ما ينكر فضل حد بعد فضل ربنا عليه أو ينساه

بيفضل باقي على العشرة لحد آخر لحظة وبيعمل كل اللي عليه وزيادة ,

مبيردش الأذي بالأذي ,

وقت الشدة لو احتجته لازم هتلاقيه ويمكن من غير ما تطلب كمان هتلاقيه قدامك ,

بيساعد الكل من غير أي مصلحة تعود عليه ,

إبن الأصول كرامته عنده رقم 1   ومستحيل هيقبل أي إهانة , ونفسه عزيزة عليه فوق ما خيالك ممكن يوديك ,

إبن الأصول بيعرف يعتذر , لو غلطان مش بيستكبر , يقول أنا آسف وغلطت فعلاً وغلطه مبيكرروش ,

إبن الأصول كلمته واحدة , لما يقولك هعمل صدقه ,

إبن الأصول ضميره من جواه بيتحكم فيه ومبيسلمش ودانه لحد ,

إبن الأصول صاحب صاحبه جداً , مستحيل يبيع صاحبه علشان مصلحته ,

إبن الأصول حد جدع بالفطرة , الطيبة ملازماه ,

إبن الأصول ملوش في اللت والعجن وكتر الكلام وشغل النسوان ,

إبن الأصول بيعرف يعاتب مرة واتنين وثلاثة علشان مش من طبعه إنه يفرط في حد بسهولة , بس لما بيفرط ربنا ما يوريك , عمرك ما هتعرف ترجعه تاني ,

إبن الأصول ملوش في الحوارات بيقولك في وشك اللي هو عايزه , وإيه اللي ينفع وإيه اللي مينفعش , اللف والدوران مش سكته ,

إبن الأصول عزيز وله بدل العزيز عزيز واتنين , مش زي غيره مالوش غالي ,

إبن الأصول لو اتظلم عمره ما يظلم , بيسيب ربنا يجيبله حقه ,

إبن الأصول بيصفي بسرعة لو لقاك شاري , وينسي بسرعة لو لقاك بايع ,

إبن الأصول بيحب الخير لغيره حتي لو مش هيطول من الخير ده حاجة , وبيفرحلك من قلبه بجد ,

إبن الأصول عينه شبعانه عمره ما يبص في رزق غيره ولا يبص في حياة غيره ,

إبن الأصول بيقدر ويحترم أبسط وأقل حاجة حلوة بتعملها معاه ,

إبن الأصول مبيعرفش يخون ولا يجرح ولا يستغل فرص ولا يستغل حد ,

إبن الأصول صاحب الكل ,

إبن الأصول ميعديش عليه واجب , ويديلك حقك من غير ما تطلبه ,

إبن الأصول يديلك اللي محتاجة عادي جداً , ويطلع من جيبه لحد آخر قرش معاه , مبيفكرش في نفسه وبس , طبعه وأصله الكرم ,

إبن الأصول مهما كان ناجح أو عنده كتير أخلاقه غلباه , مبيعرفش يتغر علي خلق الله ,

إبن الأصول مستحيل يعايرك باللي عمله معاك في يوم , بيسيبك لوحدك تعرف الفرق بينه وبين غيره ,

إبن الأصول جواه رحمة وعدل , ودايماً بيحط نفسه مكان غيره ,

إبن الأصول مش المشهور أو اللي بيلبس برندات , ولا اللي معاه فلوس , ولا اللي راكب عربيات وساكن في أحلي الأماكن , ولا اللي كان عيلته حتي فيها بشوات , ولا اللي بياكل بالشوكة والسكينة وبيتكلم لغات ,

 إبن الأصول مش منصب ولا جاه ,

إبن الأصول اللي بيعمل الأصول

ألف تحية لأولاد الأصول