تثبيت المحبة : بقلم ايمان العدوى

•زي ما فيه جملة بتقول ; طيب طالما ده هيريحك ‘ فيه جملة برضو بتقول ; هتيجي معايا غصب عنك ,

•زي ما فيه جملة ; فاضي أجيلك دلوقت ؟ فيه جملة ; أنا اللي برن الجرس ع الباب افتح ,

•زي ما فيه جملة ; ماشي اتفضل سلام ‘ فيه جملة ; استني أنا عايز أتكلم معاك ,

•زي ما بأؤمن باللطف ; بأؤمن بالزن والتحايل وايجاد المخارج واختلاس الفرص ,

•بأؤمن ان مينفعش اللي يحبنا يسيبنا على مزاجنا والا هيبقا ايه الفرق ,

•مهما استقوت نفوسنا متسيبوناش ليها ولا تعينوها علينا ‘ فليس كل ما لا نريده نرفضه حقاً ,

•فيه Quote قريتها من فترة يمكن بتختصر كل الكلام ده ; سلامًا لمن طرقَ الباب فوجده مُغلقاً ‘ فعذَر وأمهل وصبر ورابط وأبى الانصراف ومكثَ غير بعيد ‘ يتحيّن فرصة ويترصد ثغرة ‘ حتى رأى نصف انفراجة فانتهزها ‘ وجاز وعبر واخترق ومرّ الى قلوبنا ‘ فأثار ومنح وطبطب وأحيا وأعان وعوّض واحتوى ,

•فى الحروب من مئات السنين القلاع مكنتش بتفتح أبوابها الا لمُحاصر صلب وقوي عنده عزيمة انه يفتحها وأقسم انه ميرجعش غير ومعاه عرشها ,

•أوقات كتيرة بنكون قافلين علينا الأوضه ‘ مش عاوزين حد يدخل فى أكتر وقت محتاجين حد يكسر الباب علينا ويدخل لنا ‘ غالباً أحسن حاجة بتحصل لينا هى الحاجات اللى بتحصل غصب عننا ,

•المريض لو ما أجبرتوش انه ياخد الدواء عمره ما هيخف ,

•جلال الدين الرومى كان له مقولة بيوصف بيها اللى بنتكلم فيه ; وان كنت لا تريدني فأنا أريدك بالروح ‘ وإن لم تفتح لي الباب فأنا مقيم على أعتابك ,

•وبصراحة كده اللى ميعرفش يفرض وجوده وقت الحوجّة يمشى أحسن