دون وقول يا قلم شعر سكينه الصولي
دون وقول يا قلم
شعر/سكينه الصولي
إكتب وقول يا قلم
عن ناس طحنها الألم
مظلومة فوق الحدود
من دنيا عاشقة الجحود
مش شايفة غير الوعود
إللى بتطلع فاشوش
٠٠٠٠٠٠٠
وأكتب وقول عن بشر
وظلم زاد وأنتشر
بين ناس قلوبها حجر
فاقوا طباع الوحوش
٠٠٠٠٠٠٠٠٠٠
وأكتب حروف ع السطور
أمتي حاييجى النور
والظلم يخلع يغور
مايفضل منه رتوش
٠٠٠٠٠٠٠٠٠٠
ونعود ياناس للإله
م الظلم مانقولش أاه
والظالم ياخد معاه
كل زمايله الكروش
٠٠٠٠٠
يادنيا إهدى علينا
كفاية تنزف عنينا
دا الحظ ضاع من إيدينا
وأسودت بينا الوشوش
يارب عنا تحوش
٠٠٠٠٠
