الست دي إسمها فاطمة كانت ضيفة برنامج “حياة كريمة”

الست دي إسمها فاطمة كانت ضيفة برنامج “حياة كريمة” وهما بيصوروا الحلقة معاها بدون ما تعرف إن في حد هيساعدها أو في تصوير أصلًا قالت إنها بتشتغل في مسح السلالم وقالت كمان إنها كانت زمان بتنضف البيوت بس إتعرضت لحادث تسبب في مشكلة في الحركة وبسببها إكتفت بالشغلانه دي بس

مُقدم البرنامج “أيمن مصطفى”.. سألها نفسك في إيه ؟ كذا مرة قالت إنها بتحلم إن الناس يكونوا كويسين مع بعض ، وإن الحياة هيبقى طعمها مختلف لما الناس يقابلوا بعض مقابلة حلوة بإبتسامة ويقولوا لبعض كلام حلو .. ولما سألها عن الفلوس اللي بتكسبها عرف إنها بتاخد ٢٠ جنيه وأحيانًا ٦٠ جنيه لكن مش عارفة إجمالي اللي بتكسبه في الشهر بيبقى كام لإنها بتشتري بكل الفلوس أول بأول حاجات لأسرتها .. وقالتله إن إبنها توفاه الله بسكتة قلبية في الشارع من سنتين ومن وقتها وحزنها عليه كسر قلبها

بعدها طلب منها إنها تيجي تساعد والدته وتمسحلهم السلم في بيتهم و وافقت وإداها مبلغ ٥٠٠ جنيه في ظرف كمساعدة منه .. بعدها بلحظات فيه حد من فريق البرنامج كانت قاعدة على كرسي متحرك وطلبت منها ١٠٠ جنيه عشان تكمل وتدفع إيجار الأوضة اللي قاعدة فيها وبدون تردد إدتلها الظرف اللي فيه الـ ٥٠٠ جنيه زي ما هو !!

بعد الموقف ده ظهروا ليها وقالولها إن دي مبادرة من حياة كريمة وإدولها ١٠٠٠٠ جنيه كمساعدة ليها بس رفضت !! وإصرت على الرفض بشكل كبير جدًا وبعدها قالت جملة عظيمة :

“القرش لو مكونتش تعبت فيه اللقمة ما تتبلعش”.. وفعلًا فضلت مصممة على موقفها ورفضت تاخُد المبلغ مع إنها في أمسّ الحاجة إليه ولكن في النهاية قرر القائمين على البرنامج التبرع بإسم السيدة فاطمة محمد بمبلغ ٣٠ ألف جنيه للجمعيات الخيرية .. دول اللي ربنا سبحانه وتعالى قال فيهم :

‏﴿يحسبهم الجاهل أَغنِياء من التَّعَفُّف﴾

طوبي لعفيفي المشاعر .. الذين يمنعهم غنى أنفسهم أن يسألوا أحدًا صدقة ❤