أقوياء أم أسوياء بقلم/ مروة المصري
أقوياء أم أسوياء
بقلم/ مروة المصري
لو دورت ورا معظم الأشرار أو الأشخاص التوكسيك هتلاقي قصة مؤلمة في حياتهم حولتهم من إنسان مسالم لواحد تاني مختلف تماما…
يا أما بقى مؤذي لكل اللي حواليه أو بيكون شخص سلبي تايه بيخاف من كل الناس و ما عندوش ثقة في أي حد و لا حتى نفسه زي ما بنقول كده عنده trust issues
زي الجوكر كده في كل أجزائه الأولى يبان شخص شرير مستحيل تتعاطف معاه بتشوف عنده كراهية للعالم غير مبررة و بيكون متباهي بأذيته بل بيشوف إنهم يستحقوا الأذى
لكن في الجزء الأخير لما جاب فلاش باك لحياته و لأول جريمة ارتكبها لحظة تصريحه على الهوا في برنامج تليفزيوني أنه هو اللي قتل ال٣ شباب في المتروو
بدأ المذيع يشكك في كلامه و قاله باستهزاء:( ايه اللي يخلينا نصدقك؟)
و هنا رد الجوكر عليه فيه ٣ جمل تكشفلك الدوافع الخفية و النفسية ورا تحوله
الجملة الاولى لما جاوبه على سؤاله: (لأني ماعنديش حاجة أخسرها ، مفيش حاجة ممكن تأذيني بعد انهارده)
و دا لأنه شايف أنه اتأذى و اتوجع بما فيه الكفاية
و دا تحديدا إحساس الشخص المؤذي.. أنت مش أحسن مني ماأنا كمان أتأذيت،الجوكر كان المجتمع كله كان بيسخر منه و عاش حياته كلها متقبل السخرية و المعاناة ؛ لأنه كان عنده حافز و داعم قوي جدا و هي والدته اللي كانت بالنسبة له مساحة الأمان و الحب الغير مشروط فكان مكتفي بيها و كأن حبها ليه بيغفر وحشية العالم معاه ، لكن لما ماتت والدته اللي اكتشف إنه ابنها بالتبني لقى نفسه خسر كل حاجة و اتحول لشخص عدواني..
الجملة التانية لما الجوكر سأل المذيع و الجمهور : (أنتم ليه متعاطفين مع الشباب اللي قتلتهم ؟!! لو كنت أنا اللي اتقتلت كنتم هتدوسوا عليا و تمشوا و مش هتهتموا بيا!!)
و هنا يبين لك أن المجتمع سلب منه إنسانيته قبل هو ما يبادر بالاستغناء عنها و يتحول لمجرم و يرد الأذى.
و أخيرا قال جملة حقيقية جدا : ( لا أحد يفكر في شعور الآخرين)
و هنا بقى بيظهرلك الدافع ورا قتله للمذيع لما واجهه بحقيقته و قاله: (أنت شخص فظيع جبتني هنا المسرح بس عشان تسخر مني و تستهزأ بيا..) و قتله ع المسرح و هو بيقوله أنت تستحق دا ..
و دا لأنه مفكرش في إحساسه.. هو فكر في قوته كمذيع إنه يستضيفه و يضحك الناس عليه و يكسب جماهيرية .. و دا لأن الناس وهي بتبدأ بالأذى بتستشعر القوة على إنها تتصرف برحمة ..
و من هنا اتحول الجوكر من بهلوان طفولي طيب ضعيف مسالم ساذج لمجرم قاتل ذكي لأقصى حد في تخطيط و تنفيذ جرايمه
الشاهد في القصة دي: هو إننا أحيانا بنخلق وسطنا أشخاص مؤذية نتيجة إيذاءنا ليهم .. أحنا بنتمنى نكون أسوياء بس للأسف مش بنجتهد و لا بنسعى لتحقيق دا .. في أشخاص بيفضلوا يكونوا أقوياء على أن يكونوا أسوياء دون اعتبار لرد الفعل..
و زي ما قلت قبل كده :((الحمل لا يبقى دوما وديع ، احذر قد تنبت الأشواك في فصل الربيع)).
#أسوياء_أم_أقوياء
#من_وحي_العلاقات
#كلنا_الجوكر
#مروة_المصري
