مدخنة بفنارة بقلم الكاتب والأديب صابرقدح
مدخنة بفنارة
صابرقدح
ملعون أبوها دي سجارة
بتقلق العيلة والحارة
بتعمل ف الصدور خنقة
وتزعل الجار والجارة
هوانا العليل أصبح عليل
ويأذى … سكان العمارة
البيه مفكر انه.. بقى راجل
وهو زى المدخنة ام فنارة
يعفّر ع الناس بدخانه
ولاهيا مرجلة ولا شطارة
وصدره سرينة بايظة
زي عيل اهبل بزمارة
بتقطّع فينا أنفاسها
ويملانا دخانها بمرارة
ملعون أبوها دي سجارة..
ولْإمتى ها تتحكم فينا
ولْإمتى تعيينا وتشقينا
والبيه يعمل ليها ميزانية
أد أكل العيال… والولية
كحّته طول الليل ف الشارع
تقلق الناس النايمة والمعدّية
ملعون أبوها دي سجارة
كل مافيها إنها بلوة
عجينة قطران بمرارة
ملعون أبوها دي سجارة
……
كل اللى لاقيته ليها
اربع فوايد
زي جمر بالقلوب قايد
تكح طول الليل
يعمل الحرامى للخلف در
وعجزك السريع على عصاية
تخاف منهاالكلاب وتفر
وسنانك الهباب.. يغطيها
تقفل لالْكلام ليك يضر
وتعجل بموتك هيّا الحياة
فيها إيه يُسُرّْ
اربع فوايد مسخرة انك
تخنّق فيها وتْذر
يهج من دخانك الدبان
والناموس تقوله جِر
…..
ملعون أبوها دى سجارة
اقتصاد بيتك بيضيع
مش ناقصة مرمطة ولاخسارة
والمرارة انها لازقة بشفايفك
زي بواب على مغارة
وغارة… تتعمل كل يوم
وانت متعلق بأم.. دى سجارة
ملعون أبوها دى زفارة
و كل شين ليها….. دليل وأمارة
قاعد على شط بحر المرض
تصطاد أذاك بسنّارة
نضّف من الدخان صدرك
وحافظ شوية على جيبك
بلاش تضيّع بين الناس قدْرك
وتكفى عيلك ولا يعيبك
بكره تقابل وجه كريم
حرق مال عيالك هايصيبك
وملعونة أم دى سجارة
صابر قدح
