الطيبه مش سذاجة بقلم الكاتبه الصحفيه شريفه خلف

فيه ناس دايما ساكتين

بقلم الصحفيه شريفه خلف احمد

فى ناس دايما ساكتين

، تغلط فيهُم يسامحوا ويعدّوا وساكتين ، تتمادي ف الغلط وكسر الخاطر بردوا يسامحوا ويعدّوا وساكتين ، تكدب عليهُم ويبقوا عارفين انك كداب وبردوا يصدقوك وساكتين ! طب ايه دول !

عندنا ف مصر بيصنّفوا الناس دي علي إنهم ناس أغبيه وضعيفه وحاجات هبله كتير ، لكن الحقيقه ان الناس حلوين وقلوبهُم طيّبه والحقيقه التانيه ان مفيش حدّ أهبل غير اللي فاكر ان الطيب أهبل وضعيف ، الطيب اللي انت بتستغل طيبتُه وحُبه ليك ليه طاقه ! طاقتُه كبيره حبتين اه لدرجه انك فكرتُه مابيحسّش بس ده عشان بس بيحبك ، بس كُتر الغلط وقلة الاهتمام وعدم التقدير مش بس بيخلّص الطاقه دي لا ده كمان بيزرع مكانها جبروت

خاف م الطيب اللي باقي علي العِشره اللي بينكُم ، اللي معاشرك حُب مش لسبب ، اللي بيسامحك مره واتنين والف عشان بيحبك مش عشان ضعيف ، خاف عشان لمّا يجيب أخرُه الطيبه اللي كان بسببها بيسامحك ويعدّيلك هتبقي هي هي نفس الطيبه اللي بسببها يقدر ينهي علاقتُه بيك ف ثانيه ومن غير تفكير ، حافظ ع الانسان اللي شايلك فوق كتفُه رغم تُقل همومك ، حافظ ع اللي بيسامحك بدل المرّه الف ، حافظ ع اللي بيحبك ، حافظوا ع الناس دي ياجماعه وتجنبّوا فُراقهُم عشان مابيكونش فيه رجوع

اتقي شرّ الحليم إذا غضب

اتقي شرّ الطيب إذا قسي قلبُه

وتاني وتالت وللمرّه المليون ياجماعه ، الطيبه مش ضعف