انا نسيتَك بكل ما فيك شعر محمد ياسين الكاشف
انا نسيتَك بكل ما فيك
انا نسيتَك بكل ما فيك
نسيت صورتَك وتفاصيلَك
خلاص لاتجيني ولا اجيلَك
ووفر دمع مناديلَك
برغم الجرح هادعيلَك
وهابكيلك وهابكي عليك
يا قسوة قلبك القاسي
يابايع في الهوى وناسي
خسارة كل احساسي
يا أهلي وعزوتي وناسي
خلاص مات الغرام بإديك
هادوس على قلبي واتحمل
في حيرتي ووحدتي مكمل
في ماضي وذكرى هاتأمل
ومهما ف يوم خلاص تعمل
مافيش في القلب شوق يناديك
بنبعد كل يوم مسافات
وتخلص بالفراق حكايات
يعيش قلبي اللي جنبك مات
وتفضل حاجة ضمن حاجات
تجيبك دنيا وتوديك
يا ناسي العشرة والأحلام
وتايه جوا موج أوهام
هاسيبك ذكرى للأيام
ماعدش ما بينا أي كلام
ومش عارف كمان أرضيك
انا نسيتك بكل ما فيك
نسيت قلبي اللي كان عايش
عشانك زي مش عايش
وكنت ساعات باكون طايش
وعايش وقتي ع الهامش
وبارسم حلم ع الشبابيك
ساعات يسرح خيالي بعيد
واشوف جوا الحيطان تجاعيد
واصَبَّرْ نفسي بالتنهيد
وبافرح لما ييجي العيد
وباستنى الفَرَحْ في عنيك
حبيبي كل يوم ذكرى
اتوه وانسى ان فيه بكره
ومش من طبعي على فكره
أَغِلّْ ف نفسي أو أَكْرَهْ
وبص ف كل شيء حواليك
خلاص خلص الكلام وياك
ومش هاقدر أدوب في هواك
ولا افضل حتى أستناك
كفاية حفيت هنا وهناك
ومش قادر خلاص ألاقيك
انا نسيتك بكل ما فيك
