لعبة قذرة … وراء الهجوم على “حريم أولاد كريم”

بقلم : مها متبولي
بصراحة مكنتش اتوقع أن اللجان الالكترونية أو غيرهم من “السرسجية” ممكن يتكلموا في النقد ويهاجموا النقاد عشان بيقيموا عمل فني واجتهاد الممثلين فيه …
بقالي ٣٠ سنة صحفية عمري ما شفت حملة شرسة على فيلم زي فيلم “حريم أولاد كريم” ..حضرت مهرجانات سينمائية كثيرة ، ولم ار حملة هجوم منظمة على فيلم بهذا الشكل..
والسؤال هنا .. لحساب مين؟ تدار هذه اللعبة القذرة للهجوم على الفنانين المصريين ..لكني مضطرة اكشف السبب في نهاية كلامي ..للأسف..
في زمن النباح كل شىء مباح!!
بداية الحياة ..علمتني أن كل واحد لازم يقف عند درجته على السلم،  ويعرف حدوده.. والا الدنيا هتبقى بزرميط ..يعني مش كل واحد عبيط يعمل نفسه ابو العريف، في كل عمل لازم نقطة نظام ، لأن الشتام عاجز عن الحوار بالعقل والتفكير.
وكلنا متفقين أن من حق الناقد والقارىء ينتقد العمل الفني،  لكن مش من حقه يغلط في شخص اي فنان.. أو ناقد اخر،  ده مش مسموح لا لزعيط ولا معيط ولا نطاط الحيط.

والناس اللي بتهاجم  الفيلم ..عندي ليهم سؤال ماسمعناش صوتكم ليه لما السينما غرقت في موجة العنف والبلطجة والابتذال والتشويه وتدمير القيم والاساءة لمصر و للمصريين ..
متكلمتوش ليه لما الفن السينمائي دخل الانعاش ..والسينما بقت لعبة في ايد مرتزقة وغيرهم كتير …
من حقك تقول رأيك ومن واجبي ادافع علشان اخليك تعبر عن وجهة نظرك ، لكن مش من حقك يا بتاع “سطلانة”… انك تصادر على رأي الآخرين وحقهم في الإبداع ،و “تشيطن” اي عمل فني.
الفيلم جيد والجزء الثاني أفضل كثيرا من الجزء الأول..ونجوم العمل لايقين في ادوارهم في حدود العمل.
محدش قال إنهم وصلوا لمستوى فاتن حمامة ويوسف وهبي وعمر الشريف ..بس عيب قوى أننا نساهم في لعبة قذرة ومنظمة للهجوم على الفيلم …لعبة مدفوعة الأجر.. والهدف تشويه العمل ونجومه ومنتجته وبطلته.
عيب يا بيه انت وهو على “السوشبال ميديا ” تبقى أداة رخيصة لتشويه ناس تعبت قوي علشان تقدم عمل فني راقي ..
كام واحد داخل يعلق على المقالة ويقولك ” قبضت”..اللي  بيقبضوا معروفين يا “جعانين” يا “معفنين”..اللي بيقبض هو اللي بيقطع الطريق على كل فنان أصيل…وبيطعن فناني بلده في ضهرهم لحساب ص وس.
عشان كده مش هسمح لأحد أنه يغتال موهبة ولا يصادر على إبداع ولا يحرق مجهود الفنانين …
ارفعوا أيديكم عن مصطفى قمر وخالد سرحان وعمرو عبد الجليل وهاجموا اللي يستحقوا الهجوم ..خلي عندكم ضمير ….
ارفعوا أيديكم عن “بشرى” بلاش تصفوا حساباتكم الشخصية معاها على حساب عمل فني..يكفي اصرارها على الإنتاج في وقت صعب.. لموا لجانكم الالكترونية عنها.. لأن لعبتكم مكشوفة قوي ، وكلنا عارفين .