ليه تبيعينى شعر صابر قدح
ليه تبيعينى
. صابر قدح
ليه تبيعينى وانا بكل غالى اشتريتك
واديتك كل عمرى وانت حتى ياريتك
عملتى حساب للعشرة والسنين
تبيعى وتشتري فينا وانت فمكانك
ندفع ونغرم دم القلب عليكى
وعرق السنين اللى كان بيرويكى.
أتاريكى مش باقية علينا
واحنا مش بأدينا
نفضل على ضهرك
أو تبلعينا فى بطنك
نغمّس اللقمة بقهرك
تبكى علينا ونبكي عليكى
يام النما والسما غطا ليكى
مش انتى اللى كنتى بتقولى
سيبوا الشمس تطلع ماتقفّْلوش البيبان
ماتحبسوش النور ليزعل ويحرم يبان
سيبوا القمر يفرش على كل السطوح
ويروح يعبى من الصفا ضلة تفرٌع على الروح
ومطرح مايروح نروح وراه
ندور على شوية الضى اللى ساكن قلوبنا
يمكن ترجع الراحة والأمان اللى فقدناه
وسيبناه.. يتسرسب من بين ايدينا
كنا مالكينه وغمضنا عنه عينينا
وبصنا لاقيناكى بعتيبنا
وتلف الايام وكلنا تبيعى وتشترى فينا
مابترتاحيش غير لما يضمنا حضنك
وفى بطنك تفرمى كل السنين
ويستوى فيكى الغنى ويا الفقير
ياحبة تراب تسوى نور العين
وربنا المعين
أولها تراب واخرها تراب
ويجى الغراب
يعلمنا يعنى ايه هوا العتاب
وازاي ندارى وكستنا
والقلب اللى شاب
بعد مافقدنا الطريق
وخطوة الصديق اللى كانت
بتسند خطوتنا
ليه تبيعنى ياأمى
وانا زَرْعتك الخضرا
ومش قادرة.. انك تواسيني
وتنسّينى ضعف السنين
ومنين نجيب قلب لجبروتك
وانت كل يوم تبيعينا وتضمينا
وتطحنى قلب العذارى مابين ايديكى
اتاريكى.. شربتى كتير من قساوتنا
وياريتنا مانسينا غلاوتنا
وبعنا نفسينا للهوى والأيام
فباقولك سلام
مليون سلام للى عرف ينام
واللى مش عارف ينام
أولها تراب واخرها تراب
والدم اللى داب وأصبح تراب
صابرقدح
