حصة تاريخ .. بقلم / اشرف الشناوي
قفلوا المدارس
وانتهى العام الدراسي
والحمام نال الشهاده
قام مدرس التاريخ
حط عالحيطه الخريطه
غزه كانت احلي
من كل البلاد
كات بتضحك
كنا نتعلم ونحفظ
كل الوان الجهاد
كنا بنشوفها التحدي
كات تعدي
شايله نصر فوق كتافها
كلنا بنقول عوافها
شق ليل الضلمه نورها
كاتبه وسط الدنيا دورها
ايوا كانت عايقه جدا
لما كان الفجر يدن
كنا بنشوف الجمال
كنا بنغني في ساعتها
غزه يابنت الحلال
محلا وردات البيوت
غزه مش ممكن تموت
مهما زاد الجرح فيها
بكره ناكل من كفوفها
احلى توت
غزه يااحلى الغناوي
قلبي ولعشقك مخاوي
بكره يجي الفجر شايل
ضحكه من وسط البلاوي
بكره يرجع بابتسامتك
فوق ملامحك
شايله الوان الاماني
تسلمي ياغزه دايما
وانتي اجمل
م الاغاني ..
…………..
بقلم / اشرف الشناوي
