القصة الكاملة لضحية المحلة الكبرى .. زوجها ينهى حياتها بطعنة في القلب
رانيا البدرى
وصف محمد عبد السلام والد ” روان” ضحية زوجها بالمحلة الكبرى كيفية تلقيه خبر مقتلها بهذه الكلمات ” أنا معرفتش ان بنتى اتقتلت الا لما اتصلوا علية تانى يوم و قالوا لى تعالى خد جثتها “
و قال الأب باكيا في بث مباشر للمصرى اليوم ” أنا عايش فى محافظة الدقهلية و بنتى روان عايشة مع جوزها في المحلة الكبرى ، و كانت فيه علاقة حب كبيرة بينها وبين زوجها أحمد خلال فترة الدراسة بكلية التربية الرياضية و استمرت طوال مدة الدراسة و مكنتش اعرف الكلام دة الا لما احمد اتقدملها و هى كانت فرحانة اوى و اتجوزوا من سنة ونص و عندهم دلوقتى طفل عمره 3 شهور .
و أضاف الأب و هو في حالة صدمة ” أنا معرفتش ان بنتى اتقتلت الا تانى يوم بعد ما جالى تليفون من مركز قسم تانى المحلة و قالولى تعالى بنتك في مستشفى المحلة تعبانة شويه و اتفاجئت بتليفون تانى بيقول بنتك ماتت وجوزها اللى قتلها و تعالى عشان تستلم جثتها “.
و انهار الأب و هو يقول ” بنتى اتقتلت في نفس التاريخ اللى اتعرفت فيه على احمد يوم 3 ديسمبر و كانت بتحب تحتفل باليوم دة لكن للأسف اتقتلت في نفس اليوم “.
و أضاف الأب و هو في حالة ذهول ” عرفت من شقيق روان إن كان فى خلافات بينها وبين احمد من حوالي اسبوع بسبب تأخير ميعاد عودته من العمل اللى اتعود عليه ، و يوم الوفاة حدثت بينهما مشادة في مكان عمله
و بعدها اخذها زوجها إلى المنزل و اصر على ترك ابنه الرضيع عند والدته ، و صعد معها الى شقتهما و دار بينهما شجار وتطاول عليها بالضرب و بعدها احضر سكينا وطعنها في القلب مما أدى إلى وفاتها في الحال
بعد ما قتلها اتصل على صديق له قاله أنا قتلت مراتى فاتصل صديقه بالشرطة و لما راحوا لقوا بنتى مرمية على الأرض و تمكنت الشرطة من القبض عليه و اعترف بقتلها “
و بكى الأب قائلا : أنا مش عايز غير حق بنتى الغلبانة ، لو كان مش عايزها كان قال تعالى خد بنتك ، مش يقولوا لى تعالى خد جثتها ، أنا عاوز حق بنتى و واثق في ربنا وقضاء مصر
