......... طوق نجاه ........ ( 1 ) أنا فكري تاه وتاه رجاه وضاع دليلي واتلسع يادي الوجع محتار وعايز تذكره لأي اتجاه أي اتجـاه أو طـــوق نجــــاه يعـدي بيـا السـكه لحدود الوسع ( 2 ) قلبي اللي كان مركبه وبتهـدي في التايهين ضيـــع الدفـــــــــــــه ماعرفـش رايح فـين ماشي الطريق معووج معادش ليه مجـداف وعاد بيخاف م الموج ( 3 ) الحلم محتاج الخضار الخطوه دايره ع المدار تايهه محتاجه الدليل والليل بيعوي زي ديب الخوف مطارق والنور مفارق الضلمه واقفه ع المفارق والسكك سراديب ( 4 ) بانده خيوط الشمس تنزل تدفي لهفتي وتمد ف حبال النجاه الحياه معاداتش بكر والفكر آيل للسقوط والتوت بيترجى ف حلاه النهار جايب بنات فاتحين بيبان الأمنيات والطقس عكس الإتجاه ( 5 ) أربع صور جوا القزاز ندل / وكلب / خنجر / وقلب حواليهم البرواز الندل خان / والكلب صان والخنجر الصوان مغروز في قلب العزاز فعل البشر يدهشك بقينا كسر قزاز الفكره النشاز لو نغششت تدهسك كل الخطاوي ع السكك والحكمه بين السطور والحبر سري ( 6 ) الشجر في وش الريح لازما يميل صوت حفيف الورق فاق الصراخ العش فاتح ضلفتين بينادي ع العصافير لون الغمام قاتم ريحة المطر بترعب الشبابيك ( 7 ) الشمس .. : الشمس عاجزة مش قادره تبعت خيوط الدفا وإزاي مشاعرك تنتشي في البرد والرعشه نايمه في الضمير وإزاي أسير الخوف من غير جناح يقدر يطير ( 8 ) الحفلة لسه هاتبتدي الورد ع الطاولات مخاصم المعازيم معادش حد بيداعب الألوان والضحكة نايمة في الكاسات والساقي داير ع المدار بالصبر والسلوان ( 9 ) الإهتمام .. : الإهتمام شلال بيبعت الإحساس سيول بس القلوب عتت الأوردة قفلت بيبانها والنبض عايز مدد ( 9 ) العيون .. : العيون تايهه بتدور ع الشطوط نفسها تعدي / والمركبة سكرانة والبحر مليان حواري وأكمنة / ومتاهات والأمنيات نادت على الأحلام واقفين سوا كوورس والغنوه عن طوق النجاه (10 ) الحوت .. : الحوت هناك / لساه آمين بس مين يشبه ليونس ومعادش زيه طيبين ولا عاد هناك ياقطين يداوي الجرح في اللفه كل اللي فات / فتح الكتاب وعدى لشطه يدفى كل اللي مات / قبل الغرق كسر الدفه ............................. بقلمي معوض حلمي الفلاح الفصيح
