ارجع وكون انسان …للشاعر /صابر قدح
ارجع وكون انسان …للشاعر /صابر قدح
ومين يقدر يعيش كده.. من غير.. أمان
ومين يقدر يعيش من غير مايكون انسان
كل لحظة عايشة الموت
اللى بيطل ليها من ورا الحيطان
كل كلمة حب محتاجة لضمان
كل همسة فيها شك لتكون توهان
كل لمسة محتاجة لحبة حنان
مين بيفتكر وهو فى عز النسيان
مين بيبتكر وهو قليل الحيلة عيان
مين بيبيع كل يوم وهو خسران
وكل خطوة للحقيقة يلاقى نفسه غلطان
قرار الإهانة بقى لينا إدمان
كل حاجة بتغلى إلا الكرامة
كل افترا بيقوى وكل طغيان
ياللى عايش على نهر وأنت عطشان
ياللى دايب ف القهر ودايما حزين زعلان
بتحاول تسبق الخطوة وعلى الكتف جبل
راسخ من الأحزان
مش احنا مهبط كل محتاج وجعان
مش احنا قلة المية اللى مليانة طمان
واحنا العيش والملح واحنا النخل والرمان
اسأل علينا كل عابر سبيل وكل زمان
اسأل ليالى الذكر وحروف القرآن
اسأل آل بيت النبي والصحابة والخلان
اسأل كل معتدى عن أرض الأمان
هايضرب لك تعظيم سلام يابن طيبة
من اسكندرية لأسوان
ياأصل الحضارة والتاريخ
الدولار مخلاش ليك أى كيان
نقطة المية بيفتحها ويقفلها
على حسب
إن كان فايق ولا سكران
يقطع البناطيل على الركب
ويخليك تغنى وقت الأذان
وتسهر الليل تخمّس وبتغمّس
بدم المسكين والغلبان
كل مرة تدي الأمان للى بيخونك
ولايصونك
والظلم قدامك بتشوف آخرته
ولسه مصمم على الطغيان
يارب شفنا الموت قبل مانخش القبر
والقهر أننا شفنا الحساب قبل يوم الدين
ومتنا من الجوع وبردو علينا دين
مدينا ايدينا لغيرك ياصاحب الحكمة
وخيرك أكلوه
وقفنا بين الحياة والموت
مسافة طويلة من الأهة و الأنين
لاحنا عايشين ولا حتى ميتين
مين يصدق سبعتلاف سنة
ولسة تايهين
ضلت خطاوينا …والأمل
إننا نرجع نبقى مصريين
ضربة الفاس تفجر ألف بير
ولقمة العز يطرحها عرق السنين
وكفاية بقى قلة القيمة والتخوين
رجع الأمان وجناين الأمل بالعمل
اصنع السفينة قبل مايجي الطوفان
امسك العصايا وهش بيها المكان
واحي حبة النور اللى جواك
وارجع لسنة الرسل
واتمسك بكل حرف فى القرآن
مش هايقدر ياكلك الحوت
ولا يقدر ياخدك الموت
عمرك ورزقك لسة مانتهاش
نبضك وقدرك لسة ماتنساش
هاتلقى عليك الغطا وانت دفيان
هاتلقى الخير اشكال والوان
ارجع عن القساوة والذل
وصدق حقيقتك انك بجد انسان
انك بجد انسان
