د.لبنى يونس تكتب/ ما وراء الأحداث الجزء الثالث
د.لبنى يونس تكتب/ ما وراء الأحداث الجزء الثالث
كوكب تحيا مصر
وفي كوكب تحيا مصر…..
ومع بداية السنة وكل سنة وانتوا طيبين الحكومة رفعت أسعار باقات الإنترنت والاتصالات واسعار الكهربا ورفعت اسعار تذكرة المترو واحد جنيه… عادي ياعم كل ده متوقع طبعا ….
بس اللي لفت نظري في الموضوع هو موقف مجلس الشعب….!!
اول ما الحكومة رفعت تذكرة المترو جنيه واحد طلعوا قلبوا الدنيا ع الحكومة واستجواب وخناقة وطلب إحاطة للوزير وإزاي تعمل كدا انت كدا هتودي البلد في داهية….!!
طب يا حضرات الاعضاء إنتوا ماخدتوش بالكم ان التجار القذرين رفعوا سعر السكر لحد ٥٥ جنيه بزيادة ٣٠ جنيه مرة واحدة….!!
لأ …. ماخدناش بالنا غير من الجنيه بتاع تذكرة المترو
طب ما اخدتوش بالكم ان التجار القذرين وصلوا كيلوا البصل ل ٤٥ جنيه بزيادة ٤٠ جنيه مرة واحدة….!!!
لأ…… ما اخدناش بالنا غير من الجنيه بتاع تذكرة المترو
طب ما اخدتوش بالكم ان التجار القذرين وصلوا كيلوا الرز ل ٣٥ جنيه بزيادة ٢٠ جنيه…!!
لأ…. ما اخدناش بالنا غير من الجنيه بتاع تذكرة المترو
وغيره وغيره من جشع التجار اللي بيستغلوا الشعب
طب فين أعضاء المجلس الموقر من كل ده…!!
لا حضرتك هما ما بياخدوش بالهم غير من اللي الحكومة بتزوده علشان تحسن الخدمة
انما التجار الجشعين ف دا أكل عيشهم وحرام نحاربهم او نجيب سيرتهم علشان … ممممم واتيفر يعني
اللي انا شايفاة من وجهة نظري ؟….
ان اعضاء المجلس الموقر بيكسبوا بنط عند الشعب على حساب الحكومة…
وبيخلوا البلد هي الخصم قصاد الشعب…
طب ما كل عضو من اعضاء مجلس الشعب المحترمين يجمع التجار الكبار اللي في منطقته وهو عارفهم بالإسم….
ما هما اللي بيلموا الناس ساعة الانتخابات علشان يرشحوه…
يلم التجار دول ويتفق معاهم ان يتعمل سوق في كل منطقة والمنتجات اللي فيه تكون بنص السعر
وياعم حط يافطة كبيرة عليها اسمك وصورتك زي ما كنت حاطط صورتك جمب السيسي ساعة الإنتخابات
وقول تحتها إحنا حاسين بيكم …
والله الناس هتحترمكم
انما كل عضو من دول يطلع ينخعلوا كلمتين ويشتم ف الحكومة وفي البلد ويصور نفسه وينشر الصور في كل ديرته ويضحك عليهم ويقولهم دا انا مولع مجلس الشعب
يا حضرة العضو المحترم لازم تفهم ان لو الخدمات اللي بتقدمها الحكومة زي المترو والكهربا والقطارات والطرق مزادتش اسعارها هتنهار وترجع اوسخ من الاول
يعني حضرتك اخدت بالك من الجنيه اللي زاد …. وانطسيت في نظرك وما اخدتش بالك من الخمسين جنيه اللي زادوا في السكر واللحمة والفراخ ؟؟
ولا هما التجار تبعك وشركاتك هي اللي مدوراها ولا إيه … !!!؟
لا ومن شهر كدا شوفت فيديو لعضو مجلس شعب معرفش إسمه ايه طالع يشوي في بلكونته خروف وهو لابس الشورت
ياعم اشوي براحتك في بيتك ربنا يزيدك
بس والنبي بلاش تزعق للشعب وتقولهم انتوا لازم تبوسوا رجل السيسي…!!
انت كدا ولمؤاخذة مش بتطبل ولا بتع… ولمؤاخذة للسيسي
انت كدا طالع تهيج الشعب حضرتك ع السيسي
مهو ياتقولوا كلام يهدي الشعب يا تتفضلوا تنقطونا بسكاتكم ومش عايزين نسمع صوت حد فيكم ولا نشوفه احنا بنحب بلدنا من غيركم
كمان في كوكب تحيا مصر….
إستاد مصر في العاصمة الإدارية…
لما تشوف الإستاد الجديد في العاصمة الإدارية انت اصلا مش هتصدق ان مصر قادرة تعمل تحفة معمارية وبنية رياضية بالشكل ده…..طبعا عالمي
بس إزاي نفرح….. لا لازم ننكد على الشعب
و اول ما يتم الإعلان عن تدريب المنتخب على إستاد مصر في العاصمة الإدارية يطلع الناس المتعاصة تقولك طب مش بدل الإستاد ده كنت رخصت تذاكر المترو..؟؟
أعتقد ان معظم الجيل الحالي من الشباب مداقش مرارة صفر المونديال اللي اخدناه سنة ٢٠٠٤ في ملف تنظيم كاس العالم علشان مكنش عندنا بنية رياضية
دلوقتي وبلا فخر…. او لازم كلنا نفتخر
ان الفيفا طلبت من السعودية انها تضم مصر معاها في ملف تنظيم كأس العالم سنة ٢٠٣٥ ومعاهم اليونان
طبعا الفيفا مطلبتش الطلب ده علشان سواد عيون السيسي لا حضرتك
الفيفا شايفة ان مصر سنة ٢٠٣٠ هتكون من اقوى الدول في العالم كله في البنية الرياضية
وخصوصا الإستادات اللي بتتبني في المدن الجديدة
مش كدا وبس دا كمان مصر مرشحة بقوة لتنظيم الاولمبياد ٢٠٣٦
كمان في كوكب تحيا مصر….
فاكرين السحابة السودة اللي كانت بتغطي القاهرة ايام مبارك….!!
طبعا كلنا فاكرينها…. وساعتها كان بيترد علينا ويتقال ان سببها هو حرق قش الرز
تخيل بقا ان السحابة السودا دي اللي سودت عيشتنا في القاهرة هتكون السبب ف انها هتحط مصر على الخريطة العالمية لصناعة الاخشاب…!!
هتقولولي إزاي يعني؟
هقولكم ياعم اصبر بس على رزقك ….
في مشروع ضخم بيتعمل في مدينة إدكو في البحيرة بحوالي ٣٥٠ مليون يورو لعمل اكبر مصنع لصناعة ألواح الخشب MDF من قش الرز
يعني القش اللي كان بيتحرق ويسود عيشتنا بسحابة سودة هيتعمل منه ألواح خشب وهنوفر بيها عملة صعبة اللي كنا بنستورد بيها الخشب وهنصدر كمان …
تحيا مصر
دكتورة لبني يونس
