الصاحب ساحب .. بقلم / سندس جلال
الصاحب ساحب .. بقلم / سندس جلال
( النغمة الأولي )
كان في عصفور قلبه صغير ريشه قصير
في ابتدائي كان معايا بنت اسمها وسام في الحقيقة وسام مكانتش شاطرة خالص وعلي طول كانت بتيجي متاخرة ومكنتش بتحضر الطابور ومكنش ليها صحاب ودايما لوحدها ومفتكرش إني شوفتها بتضحك قبل كده
وسام كانت بتقعد في الفصل في آخر ديسك لوحدها ومحدش بيقعد جمبها حتي في الفسحه كانت بتبقي قاعدة لوحدها في اوقات كتير كنت بشوفها قاعدة بتعيط بس مكنتش اعرف السبب ايه وسام
كانت بتعمل شعرها ضفيرة وكان بيبوظ شكله رغم إن شعرها جميل وكانت كل شهر بتجيب درجة وحشه في الامتحان
عندنا المستر بتاع الانجليزي اسمه مستر بيتر
مستر بيتر كان الي بيجيب درجة وحشه يطلعوا بره قدام الفصل كله ويفضل يتريق عليه ويضحك الفصل كله عليه يعني مكنش بيضربه عصايتين وخلاص لا كات بيصر إنه يضحك الفصل كله عليه
وسام كانت بتطلع كل شهر علشان الفصل يضحك عليها ويشوفوها وهي بتضرب كمان كانت اي مشكلة تحصل في الفصل مجهول صاحبها هي بتلبسها تلقائي رغم أنها ملهاش دعوة ب الي حصل
قد ايه وسلم كانت بتواجه واقع مرير كل يوم وكل شهر بتستنزف معنوياً
( النغمة الثانية )
محيط الإنسان يؤثر على درجة شعوره بالسلام
لحد ما في يوم جه مستر بيتر طلعها بره علشان يضحك الفصل كله عليها كالعادة علشان جابت درجه وحشه ، قامت بنت إسمها سهام قالتله حرام عليك يا مستر وسام بشوفها كل يوم وهي مروحه قاعدة تعيط ، المستر بصلها ومهتمش بكلامها وكمل تريقه عليها وبعدين جه معاد الفسحه
سهام راحت اتكلمت مع وسام ونزلت معاها الفسحه وبقول صحاب وبقينا نشوفهم كل مره مع بعض في الفسحه وسام بقيت بتضحك اول مره اشوفها بتضحك وبقيت تيجي تحضر الطابور بدري مع صاحبتها سهام
جه معاد حصه الرسم ومس زينه بتدينا الحصه دي وهي زينه فعلاً الكل بيحبها وبنستني حصتها لأنها طيبة وعمرها ما اتعاملت مع حد بقسوة مس زينه كانت عنيها لونها عسلي وشعرها لونه بني وكانت جميلة اووووي
دخلت الفصل وقالتلنا ازيكم يا كتاكيت كله يطلع ادوات الرسم قدامه علشان نبدأ حصتنا وبالفعل كلنا طلعنا ادواتنا قدامنا ومس زينه طلبت مننا نرسم عن موضوع معين كل واحده فينا ابتديت ترسم عن الموضوع وهي واقفة بتبص علينا واحد واحد بإبتسامة جميلة
وسام بقي رسمت اجمل رسمة شوفتها لحد في السن ده ، كانت راسمة جنينة كبيرة وفيها ورد كتير وفيها كرسي كبير من بتاع الجناين ده وقاعد عليه بنت بتعيط وعاملة شعرها ضفيرة وفي بنت قاعدة مسيبة شعرها وحاطة ايدها علي كتفها زي الي بتطبطب عليها والايد التانية ماسكة فيها دبدوب بتلاعبها بيه
المس اول ما شافتها قالتلها الله ايه الرسمة الحلوة دي
انتي الي رسمتيها يا وسام !
قالتلها أيوة أنا رسمتها و سهام لونتها قالتلها انتي شاطرة اوي يا وسام وبقي كل حصه وسام بترسم ودينا بتلون لحد ما بقيت صاحبة أجمل رسومات في الفصل وابتديت تشترك في مسابقات رسم علي مستوي المدرسة ومس زينه بقيت تساعدها اكتر
( النغمة الثالثة )
الفراشات اجنحتها رقيقه لكنها تخفق بقوة
قبل الامتحانات سهام كانت بتروح عند وسام يذاكروا سوا ولو وسام مش فاهمة حاجة بتخلي سهام تفهمهلها وياكلوا بسكويت وكيكه ويشربوا شاي بلبن وبعدين سهام تقوم تروح
حوالي 3 ايام فضلوا يذاكروا مع بعض لحد ما جه معاد الامتحان وامتحنوا وبعد ما الامتحان خلص مسكوا ايد بعض ومشيوا
جه معاد النتيجة ومستر بيتر لقي وسام جايبة الدرجة النهائية في الامتحان مصدقش وقعد يقولها انتي اكيد غشيتي ازاي حليتي كده يا غشاشة انتي غشاشة وفي وسط عتابه ليها قام الفصل كله تلقائي سقفلها
راحت وسام حضنت سهام صاحبتها والمستر طلع من شنطته شوكولاته ادهالها علشان يصالحها بيها خدتها وقسمتها نصين نص خدته ليها والنص التاني ادته لسهام وخرجوا سوا ماسكين ايد بعض ، وسام سرحت شعرها زي سهام وفكت الضفيرة وقد ايه شعرها كان جميل خالص
ومع الوقت وسام طلعت الاولي علي المدرسة
سهام كانت كل الي محتاجاه وسام علشان ترجع لحياتها
الصحاب لو اخترتهم صح هتنجح في حياتك وهتنجح في شغلك وعلاقاتك الاجتماعية ودراستك
صاحبك هو ظهر ليك مش ضغط عليك هو الي هيقق جمبك وقت متكون لوحدك ، صاحبك لو كويس هيخليك احسن منه هيخليك تعيش الحياة مش مجرد فترة تقضيها هيقدر ينقلك من عالم لعالم تاني بس انت اختار … اختار صح
