ورقة بيضا .. بقلم الكاتبة/ سندس جلال

ورقة بيضا .. بقلم الكاتبة/ سندس جلال

كان في بنت جميلة اوي إسمها خديجه

خديجه كانت بشرتها بيضه وشعرها لونه اصفر وعنيها خضرة 

وكانت طيبة اووي وبتحب كل الي حواليها وعمرها ما كرهت حد وكانت شطورة جدا في المدرسة وبتذاكر اول بأول 

كان معاها صحابها اتنين هدير ورجاء بس مشكلتهم إنهم كانوا متنمرين جدا وكانوا دايما بيتريقوا علي اي حد وعليها كمان ولما كانت بتجيب درجه حلوة في الامتحانات كانوا بيقولوها كلام سلبي ف ابتدي كلامهم يأثر عليها في دراستها

وبقيت تجيب درجات قليلة في الامتحانات وبقيت في مستوي طالب متوسط ومش بس كده لا خديجه كانت كل يوم بتقعد تعيط عياط رهيب بسبب إنها بتستنزف معنوياً من صحابها ووصلت لحالة نفسية مش حلوة وبقيت تكره تروح المدرسة 

مامتها اتواصلت مع مس في المدرسة إسمها مس رباب ، مس رباب كانت طيبه اوي ورقيقه جدا وبتحب طلابها وهما كمان بيحبوها اوي 

مس رباب كانت بتدينا حصة دين 

لما عرفت الي حصل لخديجه قالت لمامتها أنا هتصرف 

مس رباب دخلت الفصل وقالتلهم ازيكم يا حلوين النهارده هناخد درس جديد خالص 

الدرس بتاعنا عن التنمر 

وجابت ورقه بيضه كبيرة وقالتلهم هختار اتنين يطلعوا

اختارت فعلاً رجاء وهدير 

قالتلهم شايفين الورقة البيضه الجميلة دي عوزاكم تقولوا كلام وحش ليها 

رجاء قالت انتي وحشه وشكلك وحش ولبسك مش حلو 

وهدير قالت ورقة رخمه ومش شاطرة و وقحه 

مع كل كلمة كانوا بيقولوها مس رباب كانت بتطبق جزء من الورقة وتكرمشه لحد ما خلصوا 

قالتهم ممكن بقي ترجعولي الورقة دي زي ما كانت مفرودة وجميلة بصوا لبعض وقالوا في صوت واحد مش هينفع يا مس دي بقيت مكرمشه 

قالتلهم ده بالظبط الي انتوا عملتوه مع خديجه صاحبتكم مع كل كلمة وحشه كنتوا بتقولوها ليها كان قلبها بيكرمش زي الورقة بالظبط ومبقتش تيجي المدرسة 

قالولها إحنا اسفين يا مس قالتلهم متتكررش تاني ولازم تصالحوا صاحبتكم وتعتذروا ليها 

هدير ورجاء راحوا زيارة لخديجه وخادولها ورد شوكولاته وقالولها إحنا آسفين يا خديجه انتي شاطرة اوي وشعرك جميل وحلوة اوي ارجعي المدرسة تاني 

خديجه بقيت مبسوطة وصالحتهم ورجعت المدرسة من تاني وطلعت الاولي علي المدرسة وهدير ورجاء جابولها شراب بفيونكه لونه ابيض وحضنوها 

اعرفوا إن قلب الإنسان زي الورقة البيضة بالظبط أقل نقطة حبر بتعلم فيه … 

لا للتنمر