ليه يا وطن ... بقلم /محمد على عاشور (إهداء إلى روح شباب الدلنجات) ليه يا وطن تطرد ولاد كانوا الأمل طول عمرنا نقرا الكتب فيها الحكم بتقول لنا إن الولاد هما اللى حيشيلو السلاح علشان يدافعوا عن الوطن ليه ياوطن حلم الأمانى بينتحر وشباب بيركب فى الخطر أوروبا بتداعب ف أحلام الولاد ليه حلم طفل بيتولد علشان يموت جوه الوطن ف بلاد بعيدة هنااااك خلف المدى حلم اتقتل ليه يا وطن حلم السفر ويا الخطر يبقا الأمان يبقا السند ليه الوطن مبقاش بيمسح دمع ف عيون الولاد ليه الولد يركب ف قطر المستحيل ويشيل كفن على كف ايد وكف ايده التانى ماسكه ف إيد أخوه و متبته ع الأمنيات و بكل قوة الموج يبحتر ف الولاد ف شمال يمين الموج بيلعب بالولاد احلام تعوم ويا الهدوم على وش موج عمال يفرق ف الولاد و الليل طويل جوه بطن البحر الاغبر حلم الوطن خطى جبروت الكابوس و ف حضن مركب انقسم تلاتين كابوس خمسين كابوس الفين كابوس مين يزود ف المزاد وطنى اللى كان أجمل وطن وطنى اللى كان حلم الغريب أصبح بيطرد ف الولاد الشقيانين و البحر غول فاتح دراعاته بيبلع ف الأمانى بيمصها و ف بطنه بتروح الآمال متبعتره و يعودوا أولادنا الغلابة الشقيانين و ف حلمهم متكفنين جوه التابوت و الحزن عشش ف البيوت جوه الوطن ليه يا وطن ليه يا وطن
