شعر و أدب

 تصريحــك ……… الشاعر/ معوض حلمي

 تصريحــك ……… الشاعر/ معوض حلمي 

ياحبيبتي فكي التكشيرة 

                  حرماني ليه من تفاريحك

ضحكة شفايفك تأشــيرة

                  ونفـسي أخــد تصريحـك

غنيـت عشــانك مـــوالي

غـيرتي فكــري وأحوالي

                   رمتيني ليه برا حـدودك

وطـال ف بعـدك ترحـالي

ياحبيبتي فكي التكشيرة

                   حرماني ليه من تفاريحك

هاتحني إمـتى وترضيبي 

وتطفي م الحـرقه لهيـبي

                   أنا بحري هايج ف هـواكي

والغــربة بتـزيد تعذيبـي

ياحبيبتي فكي التكشيرة 

                  حرماني ليه من تفاريحك

أنا راضي لو هاسكن عشة

على شط نيـلك هاتعـشى

                   واتوه ف زحـمة حواريكي

واسهر في ليلك واتمشى

ياحبيبتي فكي التكشيرة 

                   حرماني ليه من تفاريحك

أنا مـن سـلالة دراويشك

أبويا كان دفعة ف جيشك

                  فلاح وزارع فيـكي حياه

ع الفـرن باخبزلك عيشك

ياحبيبتي فكي التكشيرة 

                  حرماني ليه من تفاريحك

أنا لسـه داير في مدارك

وشـرطي يحـرسلك دارك

                   هاحميكي من ناب العادي

وابنيكي لو هدوا جـدارك

ياحبيبتي فكي التكشيرة 

                   حرماني ليه من تفاريحك

خضاري ف الغيط بيزينـك

وسنابلي بتزيد ف خزينك

                  عشــــان تنـــامي وتـدفي

واوفـي طبـة مـوازينـــك

ياحبيبتي فكي التكشيرة 

                  حرماني ليه من تفاريحك

من بدري مستني وصاحي

باشوف ف قربك أفـراحي

                   ع الكوبري وانتي معـديه

ف عنيكي يحلو صباحي

ياحبيبتي فكي التكشيرة 

                  حرماني ليه من تفاريحك

ضحكة شفايفك تأشــيره

                  ونفـسي أخــد تصريحـك

………………………………………….. 

بقلمي .. معـوض حلمي الفلاح الفصيح 

منشأة بطاش .. تمي الأمديد .. دقهلية

مقالات ذات صلة

اترك تعليقاً

لن يتم نشر عنوان بريدك الإلكتروني. الحقول الإلزامية مشار إليها بـ *

زر الذهاب إلى الأعلى