خمسينة شاي .. شعر الأديب: معوض حلمي انا كل ماباصحى الصبح ، باحسك طير غناي باعزف ألحاني واجيلك ، واعمل من قلبي الناي نقعد على شط الترعه ، ونشرب خمسينة شاي وابدر أحلامي عشان تخضر ورود للعمر الجاي ونودع غلب ماضينا ، وأنسى الأحزان وأساي دا فقربك جنـة روحي طارحه الأفـراح جواي وف عيني نعيمها الزاهي وكؤوس الهنا بيداي قربي علشان أسقيكي ، دا رضابك دا مش شاي وأسهر بالليل اناديكي والاقيكي نجوم ف سماي وباشوفك زرعة غيطي ، وخضره وجايبه هناي وباشوفك فاسي وعزة ناسي وساكنه حشاي والعمر فردته عشانك ضله وقلت هاتيجي لجاي وانا كل ماباصحى الصبح ، باحسك طير غناي باعزف ألحاني واجيلك ، واعمل من قلبي الناي
