آخر أخبار كوكبنا العجيب .. بقلم/د.سامى محمود دنيا

-ڤيتنام…

أيوا ڤيتنام … فاكرينها ؟  

 

الشرطة هناك قبضت على ست إسمها ترونغ ماي أغنى ست ف ڤيتنام مش كدا وبس…

دي المحكمةحكمت عليها بالإعدام… 

هتقولولي وليه واللي بييجي على الولايا مبيكسبش.

هقولكم ياعم الست اللي إسمها ترونغ ماي مش ست عادية دي حرباية…

ترونغ ماي دي اللي صعبانة عليكم كان عندها كشك صغير بتبيع فيه شوية شيبسي وتديك بالباقي لبان وعلى الله حكايتها… 

دا في التسعينيات حضرتك

وبعد كدا دخلت في تجارة العقارات وأصبحت من أكبر مالكي العقارات ف ڤيتنام

وسحبت قروض من البنوك الفيتامية ب ….

٤٤ مليار دولار

اه والنعمة….. ٤٤ مليار دولار سحبتهم من البنوك الفيتنامية ف اكبر عملية نصب في قارة آسيا كلها

وعلشان تصدق بس مدى كارثة القضية دي لازم تعرف ان الورق بتاع القضية بس بيزن ٦ طن…. اه والله

مش كدا وبس…

وبيتحاكم في القضية دي من اول رئيس الوزاراء الفيتنامي لحد فراش المدرسة اللي هي كانت فيها

مش كدا وبس….

دا بيتحاكم في القضية دي معظم رؤساء البنوك ف ڤيتنام كمان

كل ده بسبب واحدة اسمها ترونغ ماي…

-أمريكا….

واللي متغطي بالامريكان عريان….

وليام بيرنز مدير المخابرات الامريكية ال CIA

طلع وقال….

على آخر السنة أوكرنيا هتعلن الإستسلام ل روسيا وش

والجيش الاوكراني على آخر السنة هيكون مسلم اوكرانيا لروسيا تسليم أهالي لو الكونجرس موافقش على المعونات العسكرية لأوكرانيا

رد الكونجرس وقاله كان على عيني….

هجيب منين لا مراتي بتديني ولا مشيي بطال 

واللي كان حيلتنا بعتناه دعم لإسرائيل

-كمان ف امريكا….

مياه الشرب ف امريكا بتهدد الامريكيين بأمراض خطيرة…

لاء ثانية واحدة….

مياه الشرب ف امريكا حضرتك مش اوغندا ولا السودان ولا بوكينا فاسو حتى .

بيقولك أساتذة كلية الهندسة هناك ف امريكا بيحللوا مياه الشرب اللي بيشربوها هناك لقيوا ان نسبة المادة PFAS اللي هي البيرفلوروالكيل السام بنسبة عالية جدا

والمادة دي بتسبب السرطان وارتفاع في إنزيمات الكبد بالإضافة انها بتسبب أمراض مناعية

خد بالك دا ف أمريكا….. ف الوقت اللي فيه مصر بتبني أكبر محطات معالجة لمياه الشرب في العالم

مش كدا وبس….!!

وبتبني أكبر محطات تحلية مياه في العالم 

مش كدا وبس…

وعالجت كل شعبها من أمراض الكبد

مصر بتجهز نفسها علشان تكون دولة عظمى ف ٢٠٣٠ 

-كوريا الشمالية…

وفي كوريا الشمالية العم كيم جاب آخره

وخلاص قطع النور على آخر حاجة كانت بتربط كوريا الشمالية بكوريا الجنوبية

ودا كان طريق بين الكوريتين كان معمول على امل العلاقة الدبلوماسية ترجع بينهم في يوم من الايام

مش كدا وبس…

دا الراجل قطع الخط الساخن اللي كان بين قيادة الجيشين ولم السلك وشال العدة كمان 

والكلام دلوقتي على ان جيش كوريا الشمالية بيتدرب تدريبات خاصة لإقتحام سيول عاصمة كوريا الجنوبية

مش بقولكم الراجل جاب آخره

إيران…

وفي لعبة المصالح و لما المصالح بتتقابل كله بيتصالح ….

إسرائيل فجإت العالم كله يوم الخميس الفجر بضرب مدينة اصفهان ف إيران بصواريخ ….

هتقولولي إيه اللي بتقولية ده…!!

إيه المفاجأة في كدا….. دا عم أحمد بتاع عربية الفول اللي على اول الشارع كان عارف إن إسرائيل هتضرب إيران كدا وكدا …

هقولكم وهو يعني خالتك ام محمود بتاعة الخضار اللي على اول الشارع مكنتش عارفة إن إيران هتضرب إسرائيل كدا وكدا …

والعالم كله عمل نفسه مصدق ومتفاجئ 

إيران ضربت شوية صواريخ وطيارات مسيرة فشنك وأثبتت لإسرائيل إنها تقدر توصل لحد عندها

وإسرائيل ضربت رادار خاص بقاعدة صواريخ S300 ف اصفهان علشان تثبت لإيران انها تقدر توصل لأرضها

بس لا إسرائيل هتدمر إيران ولا إيران هترمي إسرائيل في البحر علشان الإتنين محتاجين بعض….

هتقولولي وبعدين بقا في اللخبطة دي …

هقولكم شوفوا….

لازم تعرف إيه الأضرار الي حصلت من المواجهه دي وإيه المكاسب اللي الإتنين كسبوها علشان تفهم القصة كلها….

أولا الأضرار…. صفر في الناحيتين

إنما المكاسب….

عند إسرائيل ….

ضرب إيران لإسرائيل كان بمثابة قبلة الحياة للنظام هناك حرفيا….

وخصوصا إنه لحد دلوقتي الجيش الذي لايقهر بقاله ١٠٠ يوم بيحارب في غزة ومقدرش يحرر الاسرى بتوعه ولا حتى عارف هو بيحارب مين رغم إنه كان بيقول للعالم كله إنه جامد فورتيكة

كمان من مكاسب إسرائيل …

ودا من أهم المكاسب إنه كسب إستعطاف النظام الدولي…. وياعيني النظام الإيراني مضطهده وعايز يخلص عليه وشوف يا استاذ وشوفي يا ابله إيران بتضرب علينا صواريخ…

كمان من اهم مكاسب إسرائيل من ضرب إيران ليها إنه قدر يلم المظاهرات اللي عنده اللي كانت خلاص هتقلب لحرب شوارع والمتظاهرين كانوا خلاص هيقتحموا بيت نتنياهو قبل الضربة بيوم

مش كدا وبس…

ومعرفوش يقتحموا رفح علشان السيسي حطلهم خط أحمر

فكدا حكومة النتن هتلبس طرحةوهتتحاكم عسكريا …. طب يعملوا إيه علشان يخرجوا من هذا المزنق …

يقوموا يضربوا سفارة إيران في سوريا….

وهو الصاحب ليه عند صاحبه إيه غير تلات حاجات ….

تقوم إيران ترد….. بس كدا وكدا….

ويكسبوا كل المكاسب اللي فاتت دي في ضربة واحدة

هتقولولي طب وإيران كسبت إيه….

كسبت هيبتها في وسط الشرق الاوسط

إيران كان لازم تثبت لبهاليلها إنها بتحارب إسرائيل

مهي بقالها ٨٠ سنة بتقول إن إسرائيل عدوها الاول ومفرقعتش فيها حتى بومبة

تاني مكسب….

ودا أهم مكسب…..

إنها تكسب الوقت لإستكمال مفاعلاتها النووية

تالت مكسب…. 

مكسب الجبهه الداخلية وخصوصا ان النظام الإيراني مكروه من شعبه جدا

طب وأمريكا مكسبها إيه في القصة دي كلها….

أمريكا هي اكتر دولة في العالم بتحافظ على النظام الإيراني علشان يفضل بعبع الخليج

وتفضل أمريكا بقواعدها بسلاطتها ب بابا غنوجها تحلب في الخليج

وكمان علشان تحافظ على هيبتها في العالم كله 

مش بقولكم…. في المصالح كله بيتصالح

           كوكب تحيا مصر 

– وفي كوكب تحيا مصر….

دولة بوركينا فاسو النهاردة في التلفزيون البوركيني وعلى لسان وزير دفاعها بتشكر مصر….

علشان وصلتها اول دفعة من المدرعة تمساح مصرية الصنع وناقلات الجند

لا إستنوا ما تفتكروش مصر إدتهالهم صدقة جارية على روح الحج فاسو…

هتقولولي أومال إيه….

هقولكم لا حضرتك دول إشتروهم من حر مالهم

مش بوركينا فاسو وبس

دي بورندي كمان و اوغندا…..وغيرهم

وفرنسا….. آه والله فرنسا كمان بتشتري سلاح من مصر

فاكرين معرض إيديكس للسلاح اللي بيتعمل كل سنة في مصر 

أهو المعرض ده معمول مخصوص لعرض السلاح اللي بتصنعه مصر 

هتقولولي طب وهنستفاد إيه لما نبيع سلاح ….

هقولكم يا عزيزي لازم تعرف إن أضخم تجارة في العالم … لا مش الزراعة

ولا الصناعة

ولا حتى المخدرات

أضخم تجارة في العالم هي تجارة السلاح بس كانت مقتصرة على دول معينة

اومال انت فاكر الخناقة اللي بين روسيا وامريكا على إيه…. على حاجات كتير طبعا ومنها تجارة السلاح حضرتك

قبل السيسي كان من المحرمات على مصر تصنيع وتجارة السلاح

ماهو لو انت عملت كدا تبقا حضرتك حطيت راسك براس الدول العظمى

انما لما وصل السيسي للحكم كان من اول الحاجات اللي كان مصمم يحققها هو إنتاج وتصنيع السلاح

مش كدا وبس….

احنا حضرتك وصلنا لمرحلة تصدير السلاح كمان 

وبقينا نبيع لكل الدول العربية والإفريقية وفرنسا وإسبانيا كمان وقريبا إيطاليا…. بس إيطاليا عندها شوية مشاكل إقتصادية 

مش بقولكم الجيش المصري هيبهركم 

كمان في كوكب تحيا مصر….

أول مدينة صناعية مصرية وأكبر مدينة صناعية مصرية ….. فين تفتكروا 

في شرق إفريقيا….

اقصد اية بكدا 

أقصد إن مصر خلاص أخدت قطعة ارض تقدر ب ٢٠٦ مليون متر مربع في تنزانيا وشركة السويدي هتبني هناك اكبر مدينة صناعية مصرية هناك ب ٤٠٠ مليون دولار..

أيوا شايف الاستاذ اللي هناك اللي بيبرطم ويقول مش كانوا بنوها هنا في مصر…

هقولكم مهو السويدي برضوا لسه واخد قطعة ارض ف اكتوبر على مساحة ٢ مليون متر مربع وهيبني عليها ٤٠٠ مصنع

المدينة الصناعية اللي في مصر دي بمصانعها هتكون مرتبطة بالمدينة الصناعية اللي في تنزانيا علشان تقدر تسيطر على كل دول شرق إفريقيا إقتصاديا

هو إنت مش كنت زعلان على عصر عبدالناصر اللي كان مسيطر على إفريقيا…أهو جالك السيسي اللي هينيم إفريقيا من المغرب 

كمان في كوكب تحيا مصر.