فيه ناس كده ، حلوة في طلتها و كلمتها و قعدتها .. ناس تتمني تتكلم معاها و تسمعها من جمال روحها .. الناس دي فيها "طبيعة زي السكر" ، من اول ضحكة تعرفه ، و من اول مقابلة تحبه .. تلاقي كلامها كله حلو ، كوكتيل لطف علي حب علي تواضع علي خفة دم ، علي دعوات و امنيات حلوة و مريحة.. حتي في فن الغنا ، أصحاب الخبرة ما يقولوش "صوته حلو" ، يقولوا "حسه حلو" ، لان ممكن صوته حلو بس ما لوش حضور و لا قبول .. صاحب الروح الحلوة ده هو اللي بيدي الدنيا طعم ، و يصبر علي الناس همها و غمها ووجعها .. ده بقي النوع اللي مش بيفكر حتي يزعل حد ، و لو حد زعله تلاقيه بقلبه الأبيض يجري يصالحه و ما يسيبوش مكسور الخاطر .. تحس انه مش عايش لنفسه و لا بيفكر فيها ، كل همه انه بس يشوف الفرحة في عينين الناس .. سلام و فرح و بركة لكل صاحب قلب ابيض منور ، لكل من سبب للناس ضحكة و رضي، و لكل من دوق الناس حلاوة الملاك الجميل اللي جواه ..
