انطلاق مهرجان الغردقة لسينما الشباب في شهر ستمبر المقبل

وليد

إدارة مهرجان الغردقة لسينما الشباب، حددت ميعاد الدورة التانية ليه من 19 لـ 25 سبتمبر 2024، تحت رعاية وزارة الثقافة المصرية ووزارة الشباب والرياضة ومحافظة البحر الأحمر ونقابة المهن السينمائية.

إدارة المهرجان هتستقبل الأفلام الطويلة والقصيرة ومشروعات الطلبة لحد 15 يوليو، وعروض أفلام المهرجان هتكون في دور عرض بوسط مدينة الغردقة والقرية الشبابية وقصر ثقافة الغردقة، وفيه عروض خاصة على شاطئ البحر.

السيناريست محمد الباسوسي، رئيس المهرجان، والدكتورة إيمان يونس، عميد المعهد العالي للسينما، وقعوا بروتوكول تعاون بين المهرجان والمعهد، يتضمن مشاركة المعهد في مسابقات أفلام الطلبة، وتنظيم ورش خاصة لصناعة الأفلام بيقدمها أساتذة من المعهد ونجوم السينما المصرية.

المهرجان كمان قرر يخصص برنامج سنوي يعرض فيه مشاريع كبار المخرجين من المعهد اللي ساهموا في تطوير صناعة السينما، زي علي بدرخان وهاني لاشين، اللي هيعرض ليه المهرجان فيلم وثائقي من إخراجه عن الفنان الراحل عمر الشريف.

زور الموقع الإلكتروني للمهرجان من خلال اللينك ده:
hurghadafilmfestival.com