بعد تصدرها التريند .. راندا البحيري توجه رسالة خاصة لجمهورها
كتبت/ رانيا البدرى
وجهت الفنانة راندا البحيري، رسالة لجمهورها بعد تصدرها التريند في الأيام الأخيرة بسبب ظهور وزنها زائد في تسجيل بعض البرامج.
وكتبت راندا، عبر حسابها الرسمي بموقع التواصل الإجتماعي “فيسبوك” قائلة: “اطمنوا عليّ..أنا كويسة جدا الحمدلله ..اللي كان مخليني مش فرحانة فتره طويلة ان كان فيه أسرار كتير و حاجات مقولتهاش لبني آدم وحاولت أقولها للناس المعنية بحلها و معرفتش”.
وأضافت: “بس بجد لما خرجت مني للناس القريبين الطيبين ارتحت الحمدلله جداً إنما فكرة الشغل و كده أنا مش بشتكي أساساً و لا عايزه حاجه من حد و الحمدلله أنا حالتي المادية كويسه جداً و شغاله في حاجات كتير تانيه غير التمثيل”.
وتابعت قائلة: ” بالنسبه للوزن الزائد اللي ظهرت بيه في حلقة الإعلامية الجميله أوي مروه صبري أنا كنت خارجه من دور برد قاسي قعد معايا شهر خدت فيه ٣ علب مضاد حيوي و خدت دواء علشان اقدر أتنفس و خدت دواء للحساسية والأدوية خلت المياه تتحبس تحت الجلد ده غير إن الزاوية اللي اتصورت منها كانت مش حلوه تماما و الاضاءه متظبطتش علي وشي صح وانا كنت مرتبطه ب برنامجين برنامج مروة صبري و بعدها ب ١٨ ساعة برنامج مروة عبد المنعم و بالرغم من ان الوزن الزائد مش حاجه المفروض أطلع أبررها”.
واختتمت كلامها قائلة: “بس أنا حبيت أوضح مش أبرر علشان لاحظت إن فعلاً فيه ناس خافت عليّ و فيه ناس تانيه ابتدت تطلع إشاعات ان فيه عندي حاجه اكبر من كده بس الحمدلله أنا بطمنكم مفيش اي حاجه واصلا المياه اللي تحت الجلد دي نزلت بعد تصوير البرنامج ب ٤٨ ساعه وانا دلوقتي حالا أحسن بكتير اوي”.
