حديث مع أمي .. دكتورة /لبني يونس
امي قالتلي زماااان ……
ماتخفيش من العفريت ولا من الجان
الخوف كله يابنتي من بني الإنسان …
العفريت والجان تحاربيهم بذكر الرحمن وتستعيذي بالله من الشيطان
لكن الإنسان ممكن يكون معاه كتاب من كتب السماء وممكن يكون حافظه كمان
بس في ناس ربنا يكفيكي يابنتي شرهم….. الاذية طبعهم والغدر في دمهم،،،
صدقتي يا امي
طيب فاكرة يا امي
ازاي كنتي بتصبريني
ووقت الشدة دايما واقفة جمبي وبتسنديني ،
وياما من ناس كنت فاكره أنهم احباب منهم يا امي حذريتني
طيب فاكرة ….
ازاي في الأزمات كنتي بتقويني وعشان اعديها بتساعديني وتنصريني
كلامك ليا كان زي السحر وللهم يا حبيبتي بتنسيني ….
ياما هونتي عليا الصعب وياما نصحتيني احذري من اعدائك لكن احذري اكتر من محبينك،،،
عمري ما حسيت يا امي اني كبرت غير لما فارقتيني وللوحده سبتيني
ولذكرياتك وصوتك في وداني تركتيني
لكن في كل لحظه روحك وكلامك معايا دليلي في طريقي ولسكتي وازاي اكمل دنيتي عرفتيني ،،،،،
حديث مع أمي
