حنـين للمـاضي .. معوض حلمى
الترعه ياخلـــــق حكايه
والتوت ابو طعم مسكر
والحــاره العايشه معـايا
وآدان الفجـــــــــر يكـبر
كان نفسي اكتبها روايه
مش قادر شــعري يعبر
عن حــــب قديم جوايا
وحنـين للماضــي بيكـبر
………..
وأحـب ركـــــوب الكارو
ومعايا الفـــاس والقـــله
وحـــريم الــدار بيطـروا
رغيفين من عيش الغله
والضــهر القايد حــــــره
نتلـــم ف حضـن الضـله
وهنــاك الناس لو مـروا
نتغدوا سـويه وشــــــله
………….
والجــار بينادي الجــاره
سارحين والغيط محـلاه
السـاقيه هنـــــاك دواره
بتعـبي المــــــروى حياه
وحسين ماســــك زماره
وطيـــور بتغـــني وراه
والبـت الراكـــبه حـماره
تتمـــايل لـو ســـــــمعاه
……..
الزرع الأخـــــــضر مـال
لنسـيم الصــبح السـارح
والسكه عليــــها عيـــال
بيداروا الفـعل الجـــارح
ماقالوش الحــال مـيال
ولاقاموا وفارقوا مطارح
فاردين أمانيــهم شـــال
وعرقهـم ورد وطـــارح
………
ع الجسر عرقـــنا بحـور
نتمايل طــول او عرض
بنصــبح ع العصـــــــفور
ونبــــوس نـــوار الأرض
وبنحــــرس باب الــدور
ع العادي نقـيم الحـــد
وبنكـــــسر ناب الــــزور
ونقــوم ونصـون العرض
…………
الوضع الحـالي فظييييع
الحق دبيـح ســــــلخوه
دلوقتي الجــرح وســيع
والعـــــزم كمان ملخـوه
أحلام النــــاس للبـــــيع
والأخ مخاصـــم اخـــوه
الجــــــو معـادش بديـع
والعــدل النـاس لبــخوه
