بعد المعاش شعر صابر قدح
بعد المعاش
صابر قدح
ولسة الشمس جايبة معاها ألم
والعطر اللى كان بينّا انعدم
ولساها طيور الليل بتنعى
قصايد الحزن طويلة
مايسجلها.. قلم
بعد المعاش
كل الألم لساه ماجاش
لسه فيه حبة غيوم
ومطرة مليانة بالهموم
ورجل جامدة تزغدك
وتقولك.. قوم
مش كل الأحلام راح تجيلك
ولا كل الأوهام من نصيبك
أصل الحياة عبارة عن تمثيلية
بتأدى دورها أحلى صبية
تجردك من كل يوم
سايبةلك ثوانى على قد النفس
تحلم بالكلام اللى انحبس
والشباب اللى اتنسف
والوش اللى انكسف
وسط الظروف
وحروف الكلام
اللى مليانة خوف
بعد المعاش
كل الأمانى مبتتناساش
كل الأحلام بتطير ف الهوا
زي الحمام
زي الألام
لما تعشش بين الضلوع
لما بتقرص ف حضن موجوع
بعد المعاش
ندور ع الأمل
بردو ماجاش
ومافيش اصعب من الإنكسار
قدام الصغار…والكبار
وكمان صعب قوى
لحظة الاعتذار
عن ورقة بيضة
يكمل فيها الولد
درسه
وقلم رصاص
ينبرى بكا و اخلاص
كل دا ولسة ماتعلمناش
واد ايه كان الحلم بسيط
رسمة راديو على الحيط
تملى وداننا بإذاعة القرأن
وشوية شخابيط
عنقود عنب وبكرة خيط
أمل.. كان كله عبيط
بعد المعاش مالحقناش
حتى المعاش
وقالوا… قانون
تفضل مربوط ف الساقية
واهى باقية
لما تموت نفكر ف المعاش
ربطنا البطن بشوية قناعة
سموها سلبية وخناعة
سموها قلة حيلة وعباطة
توهنا بين كل الطرق
واتبغددت كل البيبان
أصل اللى بان
كان غير اللى بان
ماكانش الحلم لومبرجينى
أو أيفون
كان ايها حديدة تتسمى
تليفون
ورُكَب جامدة تستحمل
اللى لسة ماجاش
بعد المعاش
اللى عاش عاش
واللى لسة ماجاش
ماجاش
الصدور هدها كتر السفر
والخدود كبيرها قدر
يلطّش ف اصداغ البنات
والحلم اللى بات
ف احضان الولاد
لساه ماجاش
بعد المعاش
أجيب منين كلام للأسف
ماهو حتى اللسان نشف
لأن لسة فى الخدود
شوية دم
بتحمل هم
اللى جاي
واللى لسة ماجاش
بعد المعاش
هافرح لما هاموت
لأنى مافيش حد يحبنى
ولاحد يعذرنى انى فقير
وانا مش فقير
ويزعلنى انى عمرى
مافتكرت نفسي
وتنازلت عن كل اللى كان
ف نفسي
وهافضل كده
أفضّل الكل على نفسي
قبل المعاش
وبعد المعاش
لسانا ما تعلمناش
صابر قدح
