فاكره يامـــه سـتي حمده لما كات تحضـن هوايا كات تقولي وهـية حامده نظــــــرتك طــــبي وداويا كان هــــواها أحلى غــيه فاكـــــــره لهفتها علــــــيا لما كـات تحضــــني قبلك تمســح الدمـــعه ف عنينا و تناديني أصــلي فجـــري فاكـره أبويا الصـبح بدري وهو ســارح ع الحـــــماره والجامـوسه وراه بتــجري بعـــد قوعبــــين الحلــيب فاكره عم الشـــيخ حبيب لما يجــــــــــي المنـــــدره يقرا لنا م القــــرآن نطيب وكان معـاه الشــيخ خلـف طب فاكره موضوع الخلف كان زمــــــان اللمه عـزوه أما زمــــــــانا فاختــــــلف هــــدينا فــــيه المصطــبه الأكـــــل عـــــاد بالكهـــربا والكـانون بقى ذكــــــريات والظـــــــــــروف متكــهربه عيـــــدنا ســـموه هالووين فاكره الساريس والجلاوين والفلق في الرجلين جحور لما كنـــــا مؤمنـــــــــــــين بالأرض والـــزرع الخضــار و الجامــــــــوسه ع المــدار بالغومـــــه والنـاف الخشب نوصــــــل الليــــــل بالنـهار والمـــــيه تجــــــري حدافه فاكـــره ضليــــلة الصفصافه والغــــدوه وقــت المقـــياله نلعــب يومــياتي ونتصـافى والشـــــمس نارها ملهلـــــبه طـــــب فاكــره أيام الصــبا والبيــوت فاتحــه البيــــبان للجـــــــــيران ومرحـــــــــبه والعيــــال مالـــيه الشـوارع طب فاكره حــــبي للكوارع والكرشه ولحــــوقي المعمر جنـــب أنجــــر فــــته بارع خلطبيـــــــطه ومهـــــــــرسه طـب فاكـره لبــس المدرسه مريلتي والجزمه البلاسـتيك عيشـــــــت دور المـــــريسه كنت باشيل كتوباتي ف أستك كنت باحس إن انا مترستك امشي فوسط صحابي اتمطع رغم الحال مايل ومخسـتك بس فقير الحال كان عايش فاكره سليم والبت غوايش كات ضحكتهم ماليه الدار رغم جـدار الدار كان بايش مكانش العالي بيعز فلوســه ولا كان بينا فقــير بندوسه فاكـــره زمانا الغالي وناسـه كنا وقـــاره وكـنا شـــموسه كنا صــغار والفعـــل فوارس فاكره الكوبري وأرض سوارس كانوا بقــــــولوا هنـاك جنيه قالوا بتظهر بـس ف مارس يعني الضـهر ماحدش يدبي فاكره الـواد منصـور الزغبي جن جـــنانه وراح عنـــديها عاد مهطـــول الوش ومغبي بقى سليوة الناس في حكاوي فاكره تاريخ الشيخ طنطاوي قالوا مصاحب ميت عفريته قلبه الميــت شكله مخـــاوي فاوعى تخاوي ابو قلب ضعيف فاكـره اللقمه وحـق الضــيف إتربينا عليـــــــــــها وكـــبرت جــوا قلـــوبنا وعــادت كيف الايام كات زي الــــــــــــورد عمر ماواحـــــــد عدى الحد وان يوم جـــــــاز واتعــدينا كنا بســــرعه نســامح بعض كنا نبــــــوس الراس والإيد فاكـره الوقـفه ولبـس العيد كنت باحــوش ترمس ستي والمضـيوع من جدي سعيد كانوا طيابه وكانـــــوا عزاز فاكرة اللنضه وريحة الجـاز فاكره اللـــــمه على الطبليه فاكره جــــيرانا وكانوا لذاذ واحنا العصــر بنلعب سيجا فاكره صراخ البت خديجـه لما ينــــــادوا علي العسـليه كانت طعــــــمه وبالتحويجه كانت طعــــــمه وبالتحويجه ..................................... بقلمي الفلاح الفصيح معوض حلمي منشأة بطاش تمي الأمديد دقهلية
