كان لينا هنا ناس شعر الكاتب والأديب صابر قدح
كان لينا هنا
ناس
صابرقدح
كان لينا هنا ناس
وانداس…
فينا الإحساس
وتوهنا مابين الصرخة
والإحتباس
هما اللى كانوا الأساس
كانوا بيضربوا فى الصميم
وتحت الحزام
ولما كنت تقول حرام
كانوا يغنوا للقرابة
وللدم اللى فى العروق زايف
وخايف… انك تشوفه
روبة من غل
وكل ماروح وانا ناسي
يصحّو الجرح بالقاسي
وصعب لما يكون الجرح منك
وتمشى كأنك….
وحيد وسط السباع
صحرا مليانة بالأوجاع
لاحد يسمع وانت بتقول الأاااااه
ولا دمع يلسع غير اللى الحزن جواه
وكان الطريق طويل أوى
لانت عارف أوله ولا منتهاه
وآاااه
لما تصادف حد وتشتكى
مش بتلاقي غير صد
واللا….مبالاه
كان لينا هنا ناس وخلاص
كاسات الدمع صفتنا
وهانتنا طيبتنا
تخاصم فينا دنيتنا
وفاتتنا كل أمانينا
ومابقاش بقى بيجينا
أمل ينور ليالينا
وراحت الناس
واتجمد الإحساس
وتوهنا وتاهت منا خطاوينا
ويبات الحلم فى عنينا
اننا نلاقى نفسينا
نحضن قلبنا المعجون
بحب الناس اللى
كانت ناس
صابرقدح
