كيفية التعامل مع الابتزاز العاطفي .. بقلم/ د.امانى نور استشاري الصحة النفسية والإرشاد الأسري

الابتزاز العاطفي….  

من أهم أشكاله هو أن تتنازل عن حقوقك وعن كرامتك وعن احترامك لذاتك ، ويمكن أن تفعل ما يريده الآخر الذي انت مرتبط به عاطفيا أيا كانت نوع العلاقة حب أو زواج أو علاقة أسرية في سبيل أن لا يتركك أو يهجرك يمكن أن تفعل أي شيء ! تحتاج حتما لمساعدة نفسية 

   لا تسمح لاحد يستغل ضعفك و جوعك العاطفي وثقتك 

   فيه ويسلب منك ما يريده شئ (عاطفي- جنسي- مادي- 

   نفسي) اويرغمك علي فعل اي شئ لا تحبه او تريده او 

   يتحكم فيك لانك تحبه فلا تستطيع ان تقاوم او تقوله لا او 

   ترفض طلباته التي لا تنتهي حتي وان كانت ضد رغباتك 

   وارادتك ومبادئك لانك تخاف انه(يزعل- يغضب منك- 

   يتركك)فلا تسمح له بذلك.فنفسك غالية جدا فلا تضحي بها‏

الابتزاز العاطفي من أسوأ أشكال التعامل في العلاقات 

والعلاقه هنا ما طبيعيك لانو بتعتمد علي خضوع طرف لطلبات الطرف التاني خوف من المغادره 

الابتزاز العاطفي: هوالاستغلال تحت شعار الحب

دا نوع من أنواع التلاعب النفسي، بيستخدم فيه شخص مشاعرك ضدك علشان يحقق مكاسب لنفسه عن طريق إنه يحسسك بالذنب أو يحسسك بإنك هتكون السبب في الى هيحصله عن طريق استنزاف مشاعرك العاطفية.

ما هي أسباب ”الابتزاز العاطفي‟: 

الشعور بالنقص: المبتز بيحس إنه ضعيف ومش قادر يحقق حاجاته بنفسه، فبيستخدم الابتزاز للسيطرة ع الآخرين

 الرغبة في التحكم: عن طريق تحريك الآخرين في إنهم ينفذوا رغباته حتي لو علي حسابهم

 مشاكل نفسية: أغلب المبتزين عاطفيا بيعانوا مشاكل نفسية زي اضطراب الشخصية النرجسية أو اضطراب الشخصية الحدية.

 تحقيق المكاسب سواء كانت شخصية أو مادية علي حساب مشاعر الناس

 أساليب ”الابتزاز العاطفي‟: 

فيه أساليب مختلفة بيتم استخدامها لاستغلال الضحية نفسيا وعاطفيا وماديا زي: 

 التهديد المباشر أو غير المباشر: زي “لو ماعملتش كدا هتخسرني”، “إنت لو بتحبني هتعمل كدا”، “أنا حزين قوي إنك مابتسمعش كلامي” 

 الشعور بالذنب: بيتعمد المبتز إنه يخليك تحس إنك ما بتعملش حاجة علشانه وبيفكرك بأبسط غلطة عملتها في حياتك حتي لو من عشر سنين، وبيستخدم كلمات زي “أنا عملت كل دا علشانك .. إنت ليه ما بتعملش حاجة علشاني؟”

 اللوم المستمر: المبتز بيتعمد إنه يلومك باستمرار علي أي حاجة بتحصل حتي لو هو السبب فيها ودايما هيقولك “إنت السبب في كل الى بيحصل ليا

ما هي أضرار ”الابتزاز العاطفي‟: 

 التأثير السلبي علي الصحة النفسية زي القلق والاكتئاب وانخفاض الثقة بالنفس

 الابتزاز العاطفي بيدمر الثقة بين الناس وبيخلي العلاقات مش صحية.

 إحساسك بالذنب طول الوقت، حتي لو مش غلطان.

 الانعزال عن الأهل والصحاب علشان تتجنب ”الابتزاز العاطفي‟.

واهم طرق التخلص من ”الابتزاز العاطفي‟: 

إفهم المشكلة: الخطوة الأولي إنك تفهم إنك ضحية ”إبتزاز عاطفي‟

 لازم تعمل حدود لعلاقتك مع الناس، وتعرف إيه المقبول وإيه الغير مقبول

 إتعلم تقول ”لا‟، للي مش عاوز تنفذه، مهما كانت الضغوط العاطفية.

 أطلب المساعدة من حد تثق فيه، سواء صديق أو فرد من العائلة، أو حتي معالج.

 في أوقات كتير أفضل طريقة للتعامل مع ”الابتزاز العاطفي‟ هو إنك تبعد عن الشخص نهائيا

الابتزاز العاطفي مش حاجة بسيطة وممكن تكون مؤثرة جدًا على الناس اللي بتتعرض له. لازم نتعلم نحمي حقوقنا العاطفية ونعامل بعض بكل احترام وصدق، ونعرف الحدود اللي ممكن نقبل فيها في أي علاقة سواء أسرية أو عاطفية.