انت ايه يا جدع ،،، مبتسم رغم الجراح والوجع كتوم وجوة صدرك تلال من الهموم تساعد الكل وابن اصول شهم وجدع علي طبلية ابوك اتربيت بيت كريم مفتوح للكل وعينك واخده عالشبع ورغم الدلع ،،، وقت الشدة ....شديد و قوي كتفك يشيل تقيل الأحمال ما ينخلع رجلك علي الارض ثابته كا الوتد واصعب ما فيك انك عنيد وتقول للدنيا انا بيقيني اقوي منك هل من مزيد ..... بتعرف تشيل هموم غيرك ، وهمومك انت لو شالها الجبل ،، ينهد انت مين بجد !!؟ ولما تتعب وتحتاج ايدين عفية ليك تتمد الابواب بتتقفل و كمان تتسد و في ضهرك مفيش معين ولا في بعد ربك حد ،،، ولسه قادر تبتسم رغم الجراح والوجع انت ايه يا جدع وعمرك ما قولت قلبي تعب واتظلم كبريائك وعزة نفسك للسما وعمرك في العيبه ما تقع مبتعرفش تميل على حد والمدهش إنك بتعرف تواسي الكل وتكون ليهم كتف وكمان سند. انت ايه يا جدع مبتسم رغم الجراح والوجع.
