طقوس لتثبيت الوجع.. كلمات الشاعر: عاصم المركبى
طقوس لتثبيت الوجع
المدينه
من أول المعّْبر حد مستشفى الكلى
الكنيسه
زاوية حماد
مسجد الغمري
البيوت الشايخه من حوض البنفسج
ناصية “خلف” ـــــ يَـمْ “فكري”
محلات “الفالوجا”
عم “سعد” بياع العسل
و ستوديو الخواجه
كل حاجه و أي حاجه .. فى المدينه
لأمرها حسمت
حبت تشوف الأنوثه ــــ إبتسمت
رسمت نجوم السما
بمنتهى الدقه
وصفك الضوء للشجر ع السكه
وصفك القطر .. للي راجع وللي ذاهب
وصفك النيل للمراكب
كله وصف ـــ وصف خايب ـــ أهدرك حقك
إحنا إخترعنا العطر من عرقك
من ضحكتك …
تم إكتشاف الموسيقى
أجمل محاوله للطبيعه .. فى بداية الخليقه
الريشه و الألوان و الفِكره العميقه
إنت الخضار قبل العمار في الكون
كنتِ الحَمار و السمار و القهوه و الفاكهه
قبل إختراع اللون
وادى المدينه بتزرع الأحزان
من غيبتك
والقطر رِّيح من غير رصيف
على غنوه واحده .. بهلع
أنا بس فين سيبتك ؟!
والنيل كفيف
هدَّته المشاوير
والبحلقه
وفشل التجارب
آدى اللي كان من بلة ضفيره
فارس ـــ محارب
الآن بينهج ـــ عَمال يشيخ
يرتعش لو صدفه قارب
ماتت التواريخ
إنتهى الصوت م الموسيقى
هجت الأزهار من سور الحديقه
تركت الأم الرضيع ـــ للبحث
ميت غمر عن كل المُدن
مابتحتفلش بعيد
ولا حس وطنى لموعد الثوره
من يوم غيابك …
إتهيئت للبعث
